ꍏꇭꍏꑷꀒꁨꋍꁘꃅꐊꑷꃅꃹꅼꃅꄺꀱ

ꍏꇩꃤꐛꏀꈴꌠꄹꎆꌠꃆꂮꏤꐪ

（2024ꈎ7ꆪ18ꑍꍏꇩꇭꍣꄈꑍꊏꈭꌠꍏꑷꊈꑼꉼ

ꌕꃢꌠꐊꈴꃀꈿꅉꇬꉌꃹꈴꄉꌠ）

ꄈꅿ꒜ꀉꒉꑍꊏꃢꌠꈿꇬꏤꅐꇁꌠꄐꇐꏤꁈꃄꌬꇫꑟꂿꄷꄉ,ꑍꊏꈭꍏꑷꊈꑼꉼꐊꈴ꒜ꌕꃢꌠꈿꇬꀒꁨꋍꁘꃅꐊꑷꃅꃹꅼꃅꄺꀱ、ꍏꇩꃤꐛꏀꈴꌠꄹꎆꌠꃆꂮꌌꎥꃪꇈ,ꄚꐰꏤꐪꋋꈨꏤꅐꇁ。

ꋍ、ꀒꁨꋍꁘꃅꐊꑷꃅꃹꅼꃅꄺꀱ、ꍏꇩꃤꐛꏀꈴꌠꄹꎆꌠꈻꇐꀉꒉꀊꂾꌠꌋꆀꉻꄜꇖꐨ

（1）ꀒꁨꋍꁘꃅꐊꑷꃅꃹꅼꃅꄺꀱꌠꀋꂿꑘꐨꌋꆀꄻꅐꐨ。ꄺꀱꁉꃑꌠꆹꄈꌋꆀꏓꂱꌤꑘꑭꁘꀊꐯꃅꐕꄉꃅꋊꐊꆹꌠꁌꇐꈤꏡꁈꀋꂿꑘꌠꉬ。ꄈꅿꊯꊪꈭꌕꃢꐊꈴ꒜ꈿꌠꆹꃅꋊꄹꄀꌠꉬ,ꄺꀱꁉꃑꌠꌋꆀꐧꋦꉪꏦꐛꏀꈴꋈꄻꌠꃅꋊꀊꏀꌠꀹꄻꄉꀐ。ꄈꅿꊰꉆꈭꌕꃢꐊꈴꃀꈿꌠꑌꃅꋊꄹꄀꌠꉬ,ꃅꋊꀊꏀꋎꌠꐊꑷꃅꃹꅼꃅꄺꀱ、ꉻꑫꉻꄜꃅꄐꎖꄉꄺꀱꄹꎆꌠꈭꈜꀊꏀꌠꀹꄻꄉꀐ,ꉪꇩꏤꄺꀱꁉꃑꌠꐛꊂꀊꏀꏃꌠꀹꄻꄉꀐ。

ꐋꀨꑮꏣꀻꈯꄜꃅꄉꌠꄈꍏꑷꆏꄈꑭꊂꂽꑭꊂꇩꏤꑭꊂꊿꋅꈁꐥꌠꏓꂱꋯꑌꃅꏃꂠꄉ,ꇰꀋ꒜ꌠꐩꋊꑴꇙꐨ、ꀋꇰꀋꉈꌠꍔꍞꀬꅑꐨ、ꀉꇨꌠꃅꎁꆹꄜꐨꌌ,ꉪꇐꉪꉻꏢꑲꌠꅸꁖ,ꈲꁧꄃꐛꌠꇊꑴꂵꅐ,ꒉꅼꅉꃹꀬ,ꃷꅍꀉꇨꌠꑝꀬ,ꃨꆰꐨꐥꌠꏭꊝꀬ,ꏟꈯꃅꋍꑞꋍꁆꏯꏦꉻꉺꏦꆐꅑꌠꀜꋊꇧꎭ,ꄺꀱꌠꆏꄹꁆꇬꄉꎹꎥ、ꐻꀺꍻꁖꌠꇬꄉꉻꑫꏓꐛ、ꐊꑷꃅꃹꅼꌠꇬꑟꃅꆹꏮꌠꃅꇫꑟ，ꈁꐥꁁꏯꅉꃀꃅꐙꌠꄹꏦꇶꏦꀑꐱꃅꄻꄉ,ꀉꑌꁁꏯꌠꆏꐩꋊꐨꐥꃅꆴꄻ、ꉻꑫꐨꐥꃅꎵꄻꀱ、ꉻꄜꐨꐥꃅꏓꄻꀱꌠꃅꇫꑟ,ꀑꐱꃅꇬꄈꅿꊰꉆꈭꌕꃢꐊꈴꃀꈿꇬꏤꄻꄉꌠꄺꀱꂿꃆꃅꌐ,ꄈꄻꋍꉐꈎꈭꏝꐛꄮꇬꆏꋍꑞꋍꁁꏯꄹꏦꀊꅰꃅꐛꒆꀊꅰꃅꐛꀕꄉꄇꇖꀕꃅꊌꐨꐥꌠꁻꌐꃅꇫꑟ,ꐊꑷꃅꊼꇅꌣꈚꌠꐧꋦꋉꐛ、ꄈꅿꉐꈎꉈꈽꁻꌐꋍꂷꂶꌠꃅꇫꑟꌠꎁꃅꊋꑌꃅꄹꏦꏦꀧꌠꇲꁵ,ꉪꇩꏤꄹꇙꌊꐊꑷꃅꐧꋦꉪꏦꐛꏀꈴꇩꏤꋈꄻꌠꈭꈜꀊꏀꌠꇬꍬꆹꎻ。

ꀋꃅꋋꄮꌋꆀꋌꊂꋍꊭꇬꆹꍏꇩꃤꐛꏀꈴꌠꌌꐊꑷꃅꇩꏤꀉꇨꌠꋈꄻ、ꊿꋅꀱꌄꆣꇁꌠꌤꑘꇰꀋꃀꌠꄹꎆꌠꀋꉬꀋꉆꊬꌠꉬ。ꍏꇩꃤꐛꏀꈴꌠꆹꄺꀱꁉꃑꅉꇬꄉꀋꆏꃅꄹꎆꌠꉬ,ꉈꑴꄺꀱꁉꃑꅉꇬꄉꊫꂫꁤꇅꀕꌠꀹꄻꅐꇁꎂꀕꌠꑌꉬ。ꌼꇪꊋꋠꌠꇩꏹꇩꈐꃅꒊꃅꇁꏭꊝꇬ,ꀊꏀꈭꌠꈆꑪꇮꇐꇝꂱꌠꌋꆀꅐꑘꆴꄻꌠꏭꊝꇬ,ꏓꂱꉹꁌꉘꇉꐨꀊꏀꌠꏭꊝꇬ,ꀋꎪꃅꐪꊛꄉꄺꀱꌠꄹꆷꅸꀒꁨꆹꌶ。ꋋꆹꍏꇩꐛꐨꐧꋦꉪꏦꄹꏦꌭꈬꌋꆀꄻꐛꒆ、ꇩꏤꏱꄻꉻꑫꌋꆀꏱꄻꄐꊋꐛꏀꈴꌠꄹꎆꌠꇖꐨꉫꎂꀕ,ꀻꎆꉪꉻꀊꏀꌠꃄꌬꈴ、ꀊꅰꃪꃅꉪꇩꏤꐧꋦꐮꄙꐨꀋꉬꀋꉆꌠꐛꐈꌠꇬꄉꄐꌠꇖꐨꉫꎂꀕ,ꀋꎪꃅꏓꂱꌌꈯꄜꃅꄉꌠꌭꈬ、ꐛꏀꈴꋈꄻꌠꊌꐨꁳꀊꅰꀉꑌꃅꀊꅰꀋꈐꀋꉈꃅꏓꂱꋍꏅꌠꁳꈲꊌꎻꌠꇖꐨꉫꎂꀕ, ꀉꒉꀊꂾꌠꃨꆰꐨꋓꎭꌠꏭꊜꄻ、ꄈꌋꆀꇩꏤꌤꑘꄹꇙꌊꄔꐽꎴꏷꌠꇖꐨꉫꎂꀕ,ꃰꊿꊫꂫꏓꐊꄜꏓꄻꌠꄹꇙ、ꉐꈎꐛꁏꐛꐨꐳꃅꐈꎆꌠꇬꄉꄐꇐꏤꁈꑴꇙꌠꊌꅜꌠꇖꐨꉫꎂꀕ,ꃹꅼꃅꃅꋊꀊꏀꋎꌠꄈꅿꋈꄻꌠꋉꃆꇰꀋ꒜ꀊꏀꌠꄹꎆ、ꀊꅰꃅꀉꇨꊋꑌꌠꂷꇻꌦꉪꏦꍔꄈꋈꄻꌠꇖꐨꉫꎂꀕ。ꄺꀱꁉꃑꌠꆹꃅꇬꎷꌠꀉꄂꉬ,ꃅꌐꄮꀋꐥꌠꉬ。ꄈꑭꊂꃅꀋꎪꃅꑴꐚꃅꄺꀱꌠꌌꀊꅰꑓꅐꎑꅉꇬꐕꄉ,ꏟꈯꀕꃅꍏꇩꃤꐛꏀꈴꌠꄹꎆꌠꇬꆼꒆꄉꀒꁨꋍꁘꃅꐊꑷꃅꃹꅼꃅꄺꀱꌶ。

（2）ꀒꁨꋍꁘꃅꐊꑷꃅꃹꅼꃅꄺꀱꌠꄐꇺꉪꇐ。ꂷꇻꌦꆺꆀꉪꏦ、꒜꒾ꄏꉪꇐ、ꄓꑦꀻꌧꇗ、“ꌕꑵꁧꎁ”ꉪꇐꀋꂿꑘꌠ、ꈆꑪꃅꀻꎆꌠꉜꐨꌭꈬ,ꐊꑷꃅꑮꏣꀻꃅꋊꀊꏀꋎꌠꍏꇩꐛꐨꐧꋦꉪꏦꉪꇐꃄꌬꈴ,ꃹꅼꃅꑮꏣꀻꊝꎻꏹꐊꑷꃅꃹꅼꃅꄺꀱꌠꃆꂮꋍꋬꈭꉪꇐꀊꏀꌠ、ꉜꐨꀊꏀꌠ、ꉉꇐꀊꏀꌠꌶꄻꃄꌬꈴ,ꐛꒆꃅꊒꌸꃅꐊꑷꃅꀻꎆꉪꉻꀊꏀꌠꃄꌬꈴ,ꎍꐽꅉꄉꀒꁨꆹꌠꌤꃅꀑꐱꅉꃀꉉꈌꌭꈬ,ꉪꇐꁌꄝ、ꑞꉬꌠꑞꃅꄉ、ꃅꋊꐊꄉꀒꁨꆹ、ꇯꍝꌠꎹꃶꐚꌠꃅꌠꌭꈬ,ꀒꁨꋍꁘꃅꐧꋦꒃꅐꊋꃤꁌꄝꌋꆀꀻꎆ、ꐧꋦꍄꑐꊋꃤꄖꄑꌋꆀꀉꇨꇁꎻ,ꇩꈐꇩꏹꃅꇴꄉꉻꀉꒉꑍꂷꌠꏓꇲ,ꏓꇲꄉ“ꉬꑵꋍꉻ”ꉻꄜꄐꉻꄹꎆ,ꋮꄮꃅ“ꇖꑵꐊꑷ”ꄐꇐꄐꉻꄹꎆ，ꎆꏣꏦꉻꄺꀱꌠꌌꈻꏁꅍꃅꄉ,ꐧꋦꀋꈐꀋꉈꑗꉬꌠꊥꎆ、ꏓꂱꐥꌒꐨꁦꎆꇁꌠꌌꄓꈌꌋꆀꑞꅉꃅꄉ,ꀊꅰꃅꉻꑫꏓꐛꌠꉜꁨ,ꀊꅰꃅꀋꉬꀋꉆꌠꄻꀨꇬꄉꌠꉜꁨ,ꀊꅰꃅꄺꀱꌠꃶꐚꇿꋌꉜꁨ,ꒃꅐꐮꃆꂮꌋꆀꒃꅐꊋꃤ、ꄩꇴꏦꉻꌋꆀꎆꏣꅉ꒜、ꇩꏤꏱꄻꌋꆀꐧꋦꀻꎆꌠꀊꅰꉾꃪꃅꐮꄉꄐꌠꄹꇙꄉ,ꍏꇩꃤꐛꏀꈴꌠꎁꃅꇙꊋꀉꇨꌠꌋꆀꄹꏦꏦꀧꌠꇲꁵ。

（3）ꀒꁨꋍꁘꃅꐊꑷꃅꃹꅼꃅꄺꀱꌠꏓꇱꁻꌐ。ꐪꊛꄉꍏꇩꐛꐨꐧꋦꉪꏦꄹꏦꄻꐛꒆꌋꆀꀻꎆ,ꇩꏤꏱꄻꉻꑫꌋꆀꏱꄻꄐꊋꐛꏀꈴꌠꄹꎆ。ꑍꄙꆀꌕꊯꉬꈎꑟꇬꆏ,ꐊꑷꃅꑞꅉꀊꂥꌠꐧꋦꉪꏦꃷꎏꎆꏣꏦꉻꄻꐛ，ꍏꇩꐛꐨꐧꋦꉪꏦꄹꏦꀊꅰꃅꐛꒆ,ꀑꐱꃅꇩꏤꏱꄻꉻꑫꌋꆀꏱꄻꄐꊋꐛꏀꈴꌠꃅꇫꑟ,ꀑꐱꃅꐧꋦꉪꏦꐛꏀꈴꌠꃅꇫꑟ,ꃅꋊꋋꋏꐧꀠꊬꌠꇬꑟꇬꐊꑷꃅꐧꋦꉪꏦꐛꏀꈴꌠꇩꏤꀉꇨꌠꋉꐛꌠꎁꃅꅉꃀꈫꈈꌠꌆꄻ。

——ꑞꅉꀊꂥꌠꐧꋦꉪꏦꃷꎏꎆꏣꏦꉻꋈꄻꌠꇬꏓꌵ,ꋒꐯꋒꃅꃷꎏꅐꀦꁆꄻꌠꇬꏤꇽꐨꐥꌠꂿꄐꋊꇤ,ꀊꅰꉾꃪꃅꍔꃚꂿꄐꋊꇤ,ꐧꋦꉪꏦꅉꀨꎆꏣꄹꏦꌭꈬꌋꆀꄻꐛꒆ,ꑞꅉꀊꂥꌠꈆꑪꇮꇐꑴꋦꑴꇨꌠꄹꎆ,ꑞꅉꀊꂥꃅꉇꉻꏭꁉꃑꌠꄹꎆ,ꐛꏀꈴꌠꎆꏣꉻꑫꄻꐛ，ꐳꃅꀻꎆꐛꊂꀊꏀꌠꏓꄻ,ꊇꁧꀊꂥꃅꀻꎆꌠꄹꇙ。

——ꈁꉬꈴꎁꃅꏓꂱꋯꁦꀻꎆꌠꇬꏓꌵ,ꄈꁳꏲꂠꎻ、ꏓꂱꑱꏲꃥꌋꄻ、ꏦꈴꇩꏲꌠꊜꋽꃅꏓꋍꃱꃅꌠꌭꈬ,ꏓꂱꑱꏲꃥꌋꄻꌠꄹꏦꀊꅰꃅꐛꒆ、ꋮꒉꋯꁦꌠꀊꐯꈭꃅꀉꑌꊐꃅꄹꏦꈴꃅꀻꎆ、ꍏꇩꐛꐨꐧꋦꉪꏦꏦꏲꉻꑫꀊꅰꃅꐛꒆꌠꄹꇙ,ꐧꋦꉪꏦꏦꏲꇩꏤꋈꄻꌠꆏꑞꅉꀊꅰꀊꂥꌠꇬꑟ。

——ꐧꋦꉪꏦꁱꀕꀉꇨꌠꇩꏤꋈꄻꌠꇬꏓꌵ,ꂷꇻꌦꉪꏦꉪꐪꐛꉻꁆꏯꇬꄐꇺꉆꈉꉆꌠꅉꀨꄹꏦꌭꈬ,ꁱꀕꌤꑘ、ꁱꀕꅐꑘꀻꎆꏦꉻꉺꏦꄻꐛꒆ，ꁱꀕꌄꆣꌠꄹꇙ,ꏓꂱꉌꊈꁱꀕꐥꐨꀉꑌꎻ,ꇩꏤꁱꀕꆓꊋꃤꌋꆀꍏꉸꁱꀕꑌꑲꊋꃤꉀꐕ。

——ꏓꂱꐥꐨꊇꁧꉀꐕꌠꇬꏓꌵ,ꊌꐨꁷꄻꌠꌋꆀꃅꅍꊌꌠꄹꏦꄻꐛꒆ，ꐧꋦꏦꀧꉻꑫꄻꐛꒆ,ꅉꀨꄉꉻꁧꃤꃅꌠꐮꆽꏣꐨꌋꆀꇫꑟꉆꐨꄻꀉꇨ,ꊿꐊꑷꃅꀻꎆꌠꄹꇙ、ꏓꂱꈁꐥꌠꃅꐯꇯꌣꈚꌠꀊꅰꃅꄇꇖꀕꌠꃶꐚꃅꁨꎆꐨꊌꅜ。

——ꎔꃨꌠꍏꇩꋈꄻꌠꇬꏓꌵ,ꐳꃅꎆꏣꐧꋦꀻꎆꌠꐊꑷꃅꀊꃴꉹꏮꌠꃅ，ꒆꉻꋦꈭꏱꄻꉻꑫꄻꐛꒆ,ꒆꉻꂴꄉ、ꏎꏸꏓꋧ、ꀊꃴꌋꀁꂥꃅꀻꎆꌠꄹꎆ,ꊿꌋꆀꋌꐛꐮꄮꃅꐯꈽꐥꌠꊥꎆ。

——ꑞꅉꀊꅰꀊꂥꌠꋬꂻꍏꇩꋈꄻꌠꇬꏓꌵ,ꇩꏤꋬꂻꉻꑫꄻꐛꒆ,ꋍꉻꃅꐙꌠꇩꏤꄐꇐꉻꑫꄻꀉꇨ,ꇩꏤꋬꂻꀧꌋꃅꄐꊋꌌꀉꇨꇁ，ꐧꋦꏱꄻꏦꉻꉺꏦꌋꆀꇇꁈꏀꀺ,ꇿꋌꐥꃅꋬꂻꐛꉻꀊꏀꌠꏓꄻ。

——ꄈꅿꏲꂠꄐꐨꌋꆀꀊꉗꃅꌅꈌꌬꌠꊋꃤꉀꐕꌠꇬꏓꌵ,ꏲꂠꄟꌋꆀꌅꈌꌫꄟꏀꀺꌋꆀꄻꃪ,ꃹꅼꃅꄈꋈꄻꄹꏦꄺꀱ,ꐊꑷꃅꏦꇨꃅꄈꏱꄻꌠꉻꑫꄻꐛꒆ。

ꅑꅸꑍꄙꆀꑍꊎꈬꈎꍏꉸꏓꂱꇭꉼꇩꄻꉆꊰꈎꈭꏝꐛꄮꑟꇬꆏ,ꏤꐪꋌꋐꇬꄜꎼꇁꌠꄺꀱꂿꃆꃅꌐ。

（4）ꀒꁨꋍꁘꃅꐊꑷꃅꃹꅼꃅꄺꀱꌠꏥꏦ。ꄺꀱꁉꃑꊂꅑꅸꇁꌠꈜꀕꇈꃅꋊꀊꏀꋎꌠꐊꑷꃅꃹꅼꃅꄺꀱꌠꎖꋪꁌꇐꈤꌠꏓꈹꌋꆀꌫꄻ,ꄚꊁꏥꏦꋋꈨꃄꌬꈴ:ꄈꐊꑷꃅꏲꂠꌠꌭꈬ,ꀋꎪꃅꄈꍏꑷꋦꒉꐨꌋꆀꏓꋍꃱꃅꏲꂠꌠꀧꌋꃅ,ꄈꃅꇴꄉꉻꏓꏲ、ꋍꑞꋍꁁꏯꋮꄮꌠꏲꂠꈯꄜꂿꄐꋊꇤ,ꄈꁳꏲꂠꎻꌠꌌꄺꀱꌠ꒔ꑞ꒔ꁁꏯꈁꉬꈴꎁꃅꏣꈴ,ꄺꀱꌠꈍꄮꑌꎃꊒꌠꍔꍞꃅꍜꇬꉜꄉꀒꁨꆹꌠꄉꀧ;ꏓꂱꌌꈯꄜꃅꄉꌠꌭꈬ,ꏓꂱꀨꄜꉆꈉꌋꆀꇫꇬꁧꀿꌠꉌꊈꁌꒉ,ꏓꂱꇖꐨꐥꑲꆏ、ꄺꀱꌠꇫꅇꀱ,ꄺꀱꌠꆹꏓꂱꁧꎁꃅꌠ、ꄺꀱꌠꆹꏓꂱꉘꇉꌠ、ꄺꀱꌠꊌꐨꆹꏓꂱꁳꐯꇯꈲꊌꎻꌠꃅꇫꑟ;ꎃꍬꏀꀺꌠꌭꈬ,ꍏꇩꐛꐨꐧꋦꉪꏦꀋꇙꀋꑐꌠꌭꈬ，ꀉꇨꃅꃅꋊꑭꁘꊂꈹ,ꃄꄻꀻꎆꌠꇬꄉꄐ,ꌤꃆꍝꄎꌠꌌꑓꅐꎑꃅꄉ,ꄓꈌꀊꏀꌠꇬꄉꌧꇗꏀꀺ、ꃄꄻꌠꏀꀺ、ꄹꏦꏀꀺ、ꁱꀕꏀꀺꌠꌋꆀꀉꁁꋍꑞꋍꁁꏯꏀꀺꌠꄹꎆ;ꄹꏦꋈꄻꌠꌌꀨꑟꃅꄉꌠꌭꈬ,ꊋꀥꇱꄉꄩꊐꌠꄐꎖ、ꉻꄜꄐꄻ,ꋊꌠꄻꌠꐯꇯꃅ、ꂴꄻꊂꋊ,ꁧꀦꄹꏦꄻꈫꈈ,ꅉꀨꄹꏦꄻꐛꒆ,ꄹꏦꀋꂿꑘꌠꏀꀺ;ꐊꑷꃅꏦꈴꇩꏲꌠꌭꈬ,ꏦꏲꍬꈜꇬꄉꃹꅼꃅꄺꀱ、ꍏꇩꃤꐛꏀꈴꌠꄹꎆ,ꄺꀱꌠꌋꆀꏦꏲꌠꐮꐊꐙꌠꃅꇫꑟ，ꀉꒉꀊꂾꃅꄺꀱꌠꏦꃤꀂꏽꁢꊧꐥ、ꐳꃅꄺꀱꊌꐨꉀꐕꌊꏦꃤꄹꏦꐛ;ꉻꑫꉪꉻꌭꈬ,ꎆꏣꌋꆀꐧꋦ、ꍔꃚꌋꆀꃷꎏ、ꑘꅐꐨꌋꆀꉻꐽ、ꍄꑐꊋꃤꌋꆀꐥꀹ、ꀻꎆꌠꌋꆀꋬꂻꑠꐮꃆꂮꀉꒉꀊꂾꌠꀞꄻꋒ,ꄺꀱꌠꉻꑫꐨ、ꉻꄜꐨ、ꋮꄮꐨꀉꇨꇁꎻ。

ꑍ、ꑞꅉꀊꂥꌠꐧꋦꉪꏦꃷꎏꎆꏣꏦꉻꏓꄻ

ꑞꅉꀊꂥꌠꐧꋦꉪꏦꃷꎏꎆꏣꏦꉻꆹꍏꇩꃤꐛꏀꈴꌠꏦꀧꅍꀋꂿꑘꌠꉬ。ꀋꎪꃅꀊꅰꉾꃪꃅꃷꎏꉺꏦꂿꄐꋊꇤ，ꃷꎏꋦꈭꀊꅰꃅꉻꐽ、ꀊꅰꃅꍄꑐꊋꃤꐥꌠꀹꄻꄉ,ꅐꀦꁆꇱꑘꅐꐨꉾꐯꉾꌠꌋꆀꊌꐨꀉꒉꐯꀉꒉꌠꃅꇫꑟ,“ꃑꍄꑐꄎ”ꇈ“ꏲꄉꄎ”,ꀊꅰꉾꃪꃅꃷꎏꐥꀹꀧꌋꃅ、ꃷꎏꂿꄐꀋꐥꌠꇬꅋꑣ,ꇩꂱꎆꏣꄻꀰꏮꁣꀋꐥꃅꄉ,ꐧꋦꑭꊂꈏꒆꇙꊋꌋꆀꏀꀺꍄꑐꊋꃤꄖꄑꌶ。

（5）“ꑍꑵꀋꇙꀋꑐ”ꌠꌭꈬꌋꆀꃅꇫꑟ。ꀋꇙꀋꑐꃅꉻꁨꏦꎆꏣꄻꈫꈈꌋꆀꀻꎆ,ꀋꇙꀋꑐꃅꉻꁨꏦꀋꉬꌠꎆꏣꀻꎆꌠꊋꊡ、ꊋꁈꄏ、ꄐꏁ,ꋍꑞꋍꑵꁨꏦꎆꏣꏦꃤꇬꈴꄉꐽꊯꃅꒃꅐꐊꊈꌫꄻ、ꀋꈐꀋꉈꃅꃷꎏꋓꅔꈽ、ꐯꌟꃅꏦꃤꁳꀧꌋꃅꎻꌠꄉꀧ,ꋍꑞꋍꑵꁨꏦꎆꏣꂱꎆꅑꐨꐯꅋꐮꑣ、ꐯꇯꀻꎆꌠꊥꎆ。

ꃹꅼꃅꇩꁨꁨꇐꇩꁨꎆꏂꑘꄺꀱ,ꏲꂠꍞꊟꏦꉻꉺꏦꄻꐛꒆ，ꄚꃆꂮꐥꌠꏲꂠꌤꏲꅉꈧꌠꄐꇐꏤꁈꋮꐊꌠꀉꇨꇁꎻ,ꇩꁨꎆꏣꄐꉻꄻꃪꌠꌋꆀꐛꉻꋊꄻꌠꄹꎆ,ꇩꁨꎆꀨꌋꆀꇩꁨꎆꏂꑘꄻꀉꇨꄻꉾꃪꄻꀉꒉꌠꄹꇙ,ꈯꄜꂿꄐꀉꇨꇁꎻ,ꈯꄜꋓꅔꊋꃤꉀꐕ。ꀒꁨꋍꁘꃅꇩꁨꎆꏂꑘꐯꀋꌡꉹꌠꂿꄐꉆꈉꏤꄻꊨꄅ,ꃅꎁꀋꉬꀋꉆꌠꃅꑘꀋꉬꀋꉆꌠꏲꂠꌠꄻꐛꒆ,ꇩꁨꎆꀨꎆꇱꀋꉬꀋꉆꁁꏯꌋꆀꃅꍜꊨꄅ。ꇩꁨꎆꀨꄹꇙꌊꇩꏤꋬꂻ、ꇩꂱꎆꏣꐥꏡꇬꃆꂮꐥꌠꉹꑘꀋꂿꑘꌠꌋꆀꀋꉬꀋꉆꁁꏯꏭꉜꄉꏓꋧ,ꇩꏤꎆꏣꏓꂱꐥꐨꇬꃆꂮꐥꌠꄉꉻꁧꃤꃅ、ꃛꊸꊜꄻꄐꊋ、ꉻꈲꐨꐥꁁꏯꑠꏭꉜꄉꏓꋧ,ꂴꂿꐨꐥꌠꄐꇐꐨꐥꌠꏀꄓꅐꑘꏭꉜꄉꏓꋧ。ꇩꁨꎆꏂꑘꇬꀦꏀꀺꄹꏦꄐꁆꌠꄹꎆꌠꄻꐛꒆ。ꃹꅼꃅꇩꁨꎆꀨꎆꇱ、ꀰꏢꇬꌦꄺꀱ。ꇩꁨꎆꏂꑘꄐꇐꃅꎁꍬꌬꌠꈋꍣꄹꏦꄻꐛ,ꇩꁨꎆꏂꑘꉹꁸꍤꎖꈋꍣꉻꑫꄻꐛꒆ,ꇩꁨꎆꏣꁦꎆꁌꐨꍤꌗꌠꃅ。ꊋꀦ、ꎸꈜ、ꄆꑠ、ꈲꒉ、ꉻꌬꌤꑘꑠꉹꑘꋌꐛꇂꇎꈭꊭꄂꋦꃅꀰꏢꌠꌋꆀꋓꅔꐨꐥꌠꈭꊭꃷꎏꈴꃅꄺꀱꌠꄹꎆ，ꍞꏲꏦꉻꉺꏦꄻꐛꒆ。

ꊋꋧꄉꉻꁨꏦꀋꉬꌠꎆꏣꀻꎆꌠꎁꃅꋦꈭꉾꃪꌠꀹꄻꌠꌋꆀꊜꋽꄮꀊꅰꀉꑌꃅꇲꁵꌠꃅꌠꌐꏦꏱꁈꌭꈬ。ꉹꁌꀰꏢꎆꏣꊥꎆꏦꃤꏤꄻ。ꃹꅼꃅꃷꎏꃹꉆꇊꑴꋊꐆ,ꅉꃀꉁꈾꋓꅔꐨꐥꁁꏯꀰꏢꀨꄜꏭꉜꄉꉻꐽꃅꁉꃑꌠꄹꎆ,ꉹꁌꀰꏢꎆꏂꑘꇩꏤꐘꑘꀉꒉꀊꂾꌠꋈꄻꌠꇬꐊꈽꌠꎴꈲꉺꏦꄻꐛꒆ。ꄐꊋꐥꌠꉹꁌꀰꏢꎆꏂꑘꂴꅑꄉꇩꏤꇮꇐꈢꇓꀖꂿꃆꀉꒉꀊꂾꌠꆹꄜꌠꇬꊋꁈꄏ,ꉹꁌꀰꏢꎆꏂꑘꏭꀒꁨꋍꁘꃅꇩꏤꈆꑪꎥꃪꅉꃀꉁꈾꀉꒉꀊꂾꌠꁉꃑ。ꉹꁌꀰꏢꎆꏂꑘꎆꏓꎆꊙꊋꁈꄏꏱꁈꄹꏦꄻꐛꒆ,ꎆꏓꊋ、ꎆꏓꁌꇨꌠꌤꃆꂥꀘꇧꎭ。ꎆꏂꑘꇬꃆꂮꐥꌠꁌꎴꎴꈲꍞꏲꌠꌋꆀꎆꏂꑘꃤꎝꁭꊒꌐꌠꏦꃤꏦꇗꉻꑫꄻꐛꒆ。ꐳꃅꉹꁌꀰꏢꎆꏂꑘꉌꒊꐛꐨꏓꇱꈋꍣꉻꑫꄻꐛ,ꉹꁌꀰꏢꐧꐭꎆꏂꑘꉌꒊꐨꁦꎆꄹꏦꄻꐛꒆ。ꉹꁌꀰꏢꎆꏂꑘꄐꏁꊋꁈꄏꄉꏱꄻꐛꉻꌋꆀꏲꂠꄹꏦꄻꐛꒆ,ꊋꀥꇱꄉꎆꏂꑘꇗꊒꃅꋈꄻꌋꆀꐙꎴꐔꈔꉆꐨꄴꏮꋎꍅ。ꊋꀥꇱꄉꌤꃅꇬꌤꃅꊂꍞꏲ,ꉹꁌꀰꏢꎆꏂꑘꇬꃆꂮꐥꌠꏲꑘꍤꄻꌠꋊꍬ。

ꍏꇩꐛꐨꐛꏀꎆꏂꑘꄹꏦꄻꐛꒆ,ꎆꏂꑘꌋꀉꇨꌠꉌꊈꍔꆙ，ꋍꑞꋍꉹꎆꏂꑘꊋꁈꄏꌋꆀꄐꏁꄉꅐꀦꐊꊈꌬꈧꑘꅐꊌꐨꌋꆀꀰꏢꏱꄻꑟꐨꉀꐕ、ꐧꋦꃅꎁꍬꌬ,ꐳꃅꋧꃅꀨꏠꌠꎆꏂꑘꀊꅰꀉꑌꃅꋈꄻ。

（6）ꇩꏤꑭꊂꋍꃱꃅꌠꃷꎏꀉꒉꌠꏓꄻ。ꃷꎏꅉꃀꄹꏦꏤꋪꋍꃱꃅꌠ、ꃷꎏꍞꏲꉻꐽꋍꃱꃅꌠ、ꃷꎏꉁꈾꎕꏦꀊꂥꃅꐮꈴꌠꄹꇙ。ꉻꐽꋓꅔꍤꄻꀉꇨꃅꏢꑲꌠꊋꀥꇱ，ꀉꇨꃅꇂꇎꌠꏭꁏꌠꌋꆀꀋꎃꀋꊒꃅꋓꅔꌠꏭꁏ,ꇩꏤꑭꊂꃷꎏꋍꃱꃅꌠꌋꆀꉻꐽꃅꋓꅔꌠꇬꑬꁌꇇꇤꌠꋍꑞꋍꑵꏤꐪꌋꆀꃄꄟꎵꄻꌋꆀꀜꋊꇧꎭ。ꃅꄷꃼꇇꎹꎆꀨꊙꌠꏦꇗꄹꏦꋊꍬ,ꏦꇨꃅꏦꐆꇗꐆꄉꏱꁈꏁꁈꈲꁵꌠꃅꐨꏢꇋ。ꋍꃱꃅꌠꏦꐛꌠ、ꈴꌗꐯꇯꌬꌠꃄꊙꊙꃅꌠꌋꆀꍔꃚ、ꌤꑘꌤꃅꅉ、ꇩꁨꎆꏂꑘꃻꄻꑠꄉꉻꅐꀦꃼꇇꐽꈉꉻꑫꋈꄻꐛꒆ,ꐘꑘꈁꉬꈴꎁꃅꄇꄜꋊꄉꏲꂠꌠꃅꇫꑟ。ꃷꎏꏓꇱꍞꏲꄐꊋꌋꆀꑟꐨꉀꐕ。ꇩꏤꎕꏦꉻꑫꄻꐛꒆ,ꃹꅼꃅꃅꄷꎕꏦꏲꂠꄹꏦꄺꀱ。

ꐊꊈꃷꎏꄹꏦꌋꆀꏤꋪꄻꐛꒆ,ꒃꅐꐊꊈꁣꀋꐥꃅꏭꇙ、ꋍꑞꋍꉹꅐꀦꇿꋌꀊꂥꃅꁆꇱ、ꃷꎏꊋꂫꋒꐯꋒꃅꄝꃑꌠꄹꇙ。ꇓꈓꇓꉈꋍꃱꃅꌠꋈꄻꌬꃅꃷꎏꏓꄻ。ꎆꀨꃷꎏꏦꐛꃅꀻꎆꌠꊥꎆꌠꅉꃀꄹꏦꄻꐛꒆ。ꇩꏤꑭꊂꋍꉻꃅꌠꇮꇐꌋꆀꃷꁨꊫꌐꃷꎏꉗꄻ。ꃷꎏꇲꈉꐮꃆꂮꁳꀋꉬꀋꉆꃅꏤꄻꎻꌠꐊꊈꁌꏤꉺꏦꄻꐛꒆ,ꍔꃚꁌꏤꏓꐛꌠꏭꀋꋭꀋꋽꃅꈌꄀꇇꏿꌠꄴꏮ。ꑘꃅ、ꎆꀨ、ꃄꅉ、ꌧꇐ、ꇮꇐ、ꏲꂠ、ꃷꁨꊫꌐꑠꒃꅐꐊꊈꄻꃷꎏꁳꅐꌞꐨꈋꍣ、ꅐꌞꐨꇬꈴꄉꁌꁵꐨꏤꄻꌠꉺꏦꄻꐛꒆ。ꀆꐒ、ꊋꀦ、ꈭꈜꑠꁁꏯꁌꏤꄺꀱꌠꄹꎆ，ꀀꊿꋍꊐꋍꊐꃅꐙꌠꒉꁌꏤ、ꄆꁌꏤ、ꐞꌗꁌꏤꄹꏦꄻꃪ,ꄻꐛꇓꋌꁌꏤꏤꄻꉺꏦꄻꐛꒆ。

ꏮꈴꏦꉻꄻꐛꒆ,ꐳꃅꎊꈬꈄꏍꇬꊛꌠꀻꎆ，ꋍꉻꃅꊪꊛꌠꏮꈴꏤꋪꌋꆀꎕꏦꄻꐛꒆ,ꐧꋦꑭꊂꎊꈬꎞꎭꀨꊰꊨꒊ。ꃹꅼꃅꊋꀦꏱꄻꏦꉻꄺꀱ,ꇩꏤꑭꊂꋍꃱꃅꌠꄆꊋꃷꎏꋈꄻ,ꇓꋌꐞꌗꁠꐤꈄꏍꏮꈴꏲꁆꉺꏦꄻꃪ。

ꐳꃅꐛꒆꌠꈏꇓꈉꐨꉻꑫꉘꉚ,ꍔꃚꎆꇱꌠꅉꃀꃅꐙꌠ、ꉻꈲꃅꐙꌠ、ꀊꉗꀊꎴꃅꐙꌠꐘꑘꀉꒉꀊꂾꌠꋈꄻꌠꇬꊋꁈꄏꌠꎴꈲꉺꏦꄻꐛ,ꍔꃚꎆꇱꌠꇿꋌꐥꃅꐧꋦꎆꇱꌠꇬꈺꇙꌠꏦꉻꉺꏦꄻꐛꒆ，ꃹꅼꃅꎆꇱꍤꄻꈌꁧꄹꏦꄺꀱ,ꐧꋦꎆꀨꎆꇱꍄꑐꊋꃤꄖꄑꌠꌋꆀꎆꇱꌠꃅꑞꅉꑟꌠꊥꎆꌠꉺꏦꄻꐛꒆ,ꃷꎏꀨꇺꌠꇿꋌꐥꃅꎆꇱꌠꈏꒆꉀꎆꉺꏦꏓꐛ。ꌬꈧꍔꒉꎴꈲꉺꏦꄻꐛꒆ,ꏢꑲꐨꐥꌠꏁꁈꊨꒊ，ꋭꋽꃅꄉꉻꌬꈧꌠꁦꎆꇱ,ꏣꀋꑌꃅꇬꂾꃑꌠꎆꏣꄹꎆ。

（7）ꃷꎏꎆꏣꅉ꒜ꄹꏦꄻꐛꒆ。ꁨꇐꌅꈌꄹꏦꄻꐛꒆ,ꏦꃤꇬꈴꄉꐽꊯꀊꉗꃅꋍꑞꋍꑵꁨꏦꎆꏣꁨꇐꌅꈌꀧꌋꃅ,ꑘꅐꐨꀊꂥꌠꌧꇐꅏꄻꌅꈌꏓꇱꏲꂠꏦꉻꄻꐛ。ꃷꎏꈴꌗꀖꅐꄹꏦꄻꐛꒆ,ꃼꇇꑘꂁꇐꀧꌋꃅꄹꏦꏓꄻ。ꋍꑞꋍꑵꁨꏦꎆꏣꁨꇐꌅꈌꌋꆀꏦꊒꌅꈌꈲꁧꇬꉄꌎꌠꃅꐨꏭꆼꎍꐨꐯꌟꑽꃤꐯꌟꅓꀞꐯꌟꌠꃄꌬ,ꅓꀞꐨꐥꌠꀵꊒꄹꏦꄻꐛꒆ。ꁨꇐꌅꈌꏦꌬꌦꃔꀧꌋꃅꌠꊋꀥꇱ,ꏲꑘ、ꅓꑘꇇꁈꌌꄉꎆꏣꏟꃆꏈꑘꇬꈌꄀꇇꏿꌠꄴꏮꌋꆀꄺꀱ,ꏦꃤꇬꈴꄉꎆꏂꑘꃆꂮꐥꌠꀋꐯꆹꑽꃣꈌꏡꃏꄺꀱꉺꏦꄻꐛꒆ。

ꃷꎏꃹꉆꄹꏦꄻꐛꒆ,ꃅꑘꐛꄟꀊꏀꌠꁁꏯꀊꏀꌠꃷꎏꃹꉆꋦꈭꄻꃪ。ꃹꅼꃅꁱꄀꎆꀨꏮꁵꏚꍆꁱꄀꄹꏦꄺꀱ,ꏦꃤꇬꈴꄉꏤꈉꇬꈴꄉꏚꍆꏮꁵꌠꃄꌬ。ꎆꏂꑘꑱꐢꉺꏦꄻꐛꒆ,ꂶꄜꊿꑱꐢꄹꏦꎹꎥꄻꐛ,ꎆꏂꑘꁱꋊꋬꈭꄺꀱꌠꄹꎆ,ꎆꏂꑘꎞꅐꄹꏦꄻꐛꒆ。ꐧꋦꉌꒊꉻꑫꌋꆀꍞꏲꄹꏦꄻꐛꒆ。

ꌕ、ꎆꏣꊇꁧꀊꂥꃅꀻꎆꌠꄹꇙꌠꏦꉻꉺꏦꄻꐛꒆ

ꊇꁧꀊꂥꃅꀻꎆꌠꆹꐊꑷꃅꐧꋦꉪꏦꐛꏀꈴꇩꏤꋈꄻꌠꂿꃆꀨꐘꌠꉬ。ꀋꎪꃅꀻꎆꉪꉻꀊꏀꌠꌌꄺꀱꌠꄐꏁ,ꀻꎆꀊꏀꊬꌠꇬꉆꄉ,ꃹꅼꃅꇲꁵꁁꏯꐛꉻꃅꐙꌠꄺꀱ,ꊇꁧꀊꂥꃅꀻꎆꌠꄹꇙꌠꊋꊡꏢꑲꉺꏦꄻꐛꒆ,ꀻꎆꌠꇙꊋꀊꏀꌠꂱꎆꅑꐨꀊꏀꌠꎵꄻꌶ。

（8）ꑞꃅꋭꌠꑞꃅꃅꊈꏀꒃꅐꊋꃤꀻꎆꌠꏦꉻꉺꏦꄻꐛꒆ。ꇮꇐꇝꂱꐨꐥꃅꂵꅐ、ꒃꅐꐊꊈꏀꀺꐨꐥꃅꁆꇱ、ꅐꑘꃹꅼꃅꉹꏮꊐꐕꌠꄹꇙ,ꑘꃅꊿ、ꑘꃅꌬꇐ、ꑘꃅꊜꀠꉾꃪꏓꇱꌠꌋꆀꏀꆦꐱꐂꌠꄹꇙ,ꅐꑘꀊꏀ、ꈁꏦꀊꏀ、ꇙꊋꀊꏀꌠꅸꁖꇁ,ꇮꇐꀊꂥꌠ、ꑘꅐꄐꊋꀊꂥꌠ、ꊇꁧꀊꂥꌠꌌꐛꄟꃅꄉꌠꒃꅐꊋꃤꀻꎆ。ꊋꀥꇱꄉꀋꉬꀋꉆꌠꐯꌟꐨꐥꌠꇮꇐ、ꂴꅑꄐꏁꇮꇐ、ꐛꏀꋉꃆꇮꇐ、ꁏꆷꐨꐥꌠꇮꇐꏀꀺ,ꊋꀥꇱꄉꀊꏀꁁꏯꀊꏀꋓꈜꄹꏦꇲꁵ,ꃆꏂꊂꑋꅐꑘꎆꇱꉀꎆꉺꏦꄻꐛ,ꀊꏀꋎꌠꈴꌗꇮꇐ、ꊿꄻꀑꁮꄐꊋ、ꃅꈯꈴꃅꈯꐚ、ꊋꀦꀊꏀ、ꌬꇐꀊꏀ、ꀊꂥꏠꌠꉁꈾ、ꒆꇐꆅꉁꁬꋌ、ꆃꌅꈆꑪꇮꇐꑠꄐꇐꏤꁈꃅꐙꌠꅐꑘꀻꎆꌠꄹꇙꌠꏱꁈꌋꆀꏱꄻꉻꑫꄻꐛꒆ,ꏀꄓꅐꑘꄐꏁꌊꉾꃪꊱꁨꃅꀻꎆ。ꇩꏤꎕꏦꌌꋊꃅꐥꌠꅐꑘꊐꐕꄻꃪꌠꉀꐕꄐꏁ,ꎆꏂꑘꃷꂷꀑꁮꇮꇐ、ꀊꃴꇮꇐꌌꋊꃅꐥꌠꅐꑘꄺꀱꉀꐕꌠꊋꁈꄏ。ꋦꈭꀧꌋꃅ、ꉮꀋꐥꑠꄹꏦꏢꑲꌠꄻꀉꇨꃅꄉ。

ꄚꃆꂮꐥꌠꏤꋪꌋꆀꏱꁈꄻꐛꒆ,ꐳꃅꊈꏀꒃꅐꊋꃤꌋꆀꀊꅰꃅꐮꄉꄐꌠꒃꅐꐮꃆꂮꏓꐛ,ꋍꑞꋍꑵꒃꅐꐊꊈꂴꅑꌠꁳꒃꅐꊋꃤꀊꏀꌠꇬꉜꄉꏓꋧꎻꌠꊥꎆ,ꀉꒉꃅꐊꊈꈁꐥꌠꒃꅐꐨꉀꐕ。ꄟꏂꎆꇱ、ꐔꈔꉆꎆꇱ、ꂁꎆꏓꇴꍆꌅꈌꎆꇱꌠꀻꎆꌠꊋꊡꌋꆀꋊꍬ，ꀊꅰꃅꉾꃪꃅꍔꃚꎆꇱꎆꀨꂿꄐꋊꇤꅐꇁ,ꉌꊫꑌꌠꎆꀨꀻꎆ。

（9）ꐥꄜꎆꏣꌋꆀꃷꂷꎆꏣꃹꅼꃅꐮꉔꌠꊥꎆꌠꄹꏦꄻꐛꒆ。ꐳꃅꀊꏀꉹꌠꇮꑘꈴꌠꄹꎆ,ꂴꅑꄺꂡꑘꁥꏓꌠꉘꉚꀉꇨꇁ,ꄺꂡꑘꀉꇨꃅ、ꀑꁮꃅ、ꀊꃴꃅꀻꎆꌠꄹꇙ。ꉹꑘꐯꌟꐨꐥꌠꇮꇐꐽꈉꈨꋈꄻ, ꐳꃅꅐꑘꈁꏦꌋꆀꎆꏂꑘꎀꍹꐛꄟꐛꐈ,ꂱꎆꅑꌠꅐꑘꂴꅑꉆꈉꏦꉻꉺꏦꄻꐛꒆ。ꅐꑘꀉꒉꀊꂾꎆꀨꌫꄻꌠꌋꆀꍞꏲꉺꏦꄻꃪ,ꎆꀨꎆꇱꌠꇩꏤꄐꇐꏤꁈꇖꐨꇬꊒꌠꄉꀧ。ꄺꂡꑘꇬꍆꁧꋭꋽꃅꎆꇱꎻꌠꉺꏦꄻꄉ,ꋭꋽꃅꄺꂡꑘꏓꇱꀨꊰꌋꆀꇗꏸꁌꀵꄜꌠꊨꒊ。

ꐳꃅꃷꂷꎆꏣꀻꎆꊥꎆꌠꏦꉻꉺꏦꏓꄻ,ꃷꁨꅐꑘꈴꌠꌋꆀꅐꑘꃷꁨꈴꊥꎆꌠꏱꁈꉻꑫꄻꐛꒆ。ꐳꃅꀊꏀꋎꌠꈴꌗꇮꇐꑞꁁꏯꉬꄿꂿꊛꏣꈁꐥꃅꌌꁊꈴꃅꌬ,ꇮꑘꐯꏑꈄꏍꀻꎆ,ꇩꏹꋓꅔꊋꃤꐥꌠꃷꂷꅐꑘꁥꄺꑣ。ꐽꈉꎆꏣꏀꀺꀻꎆꌠꊥꎆ,ꐽꈉꎆꏣꅉꀕꐛꄟꈴꌠꍞꏲꄹꏦꄻꐛꒆ。ꇩꏤꃷꁨꊫꌐꅉꃀꉁꈾꋈꄻꌋꆀꀰꏢ，ꃷꁨꊫꌐꐯꇯꌬꌠꊥꎆ。ꐳꃅꃷꁨꊫꌐꁨꇐꌅꈌꈀꄸꃤꉬꌠꏚꍆ、ꃷꎏꃼꇇ、ꌅꈌꈲꁧꁷꄻ、ꈲꁧꀧꌋꃅꄹꏦꄻꐛ,ꃷꁨꊫꌐꋬꂻꏱꄻꍞꏲꄐꊋꉀꐕ,ꇿꋌꀊꂥꌬꌒꋬꂻꌠꃷꁨꊫꌐꋯꐂꄉꏮꈴꌠꉺꏦꄻꐛ。

（10）ꁧꃤꃅꑘꀻꎆꏦꉻꉺꏦꄻꐛꒆ。ꁧꃤꃅꑘꀻꎆꌠꄏꐓꏱꁈꉻꑫꄻꐛꒆ,ꁧꃤꃅꑘꍤꌗꌠꄻꉾꃪ,ꁧꃤꃅꑘꎕꏦꈴꌠꋈꄻꌠꄹꎆ。ꈭꊭꀋꉬꀋꉆꌠꁁꏯꁸꄉꒃꅐꃅꐙꌠꁧꃤꃅꑘꊇꁧꀊꂥꃅꀻꎆꄹꎆꌠꉜꄉ,ꅐꑘꐮꈴꈄꏍꐽꈉꀻꎆ,ꃅꄷꐂꄉꀰꏢꏲꑘꇊꑴꀜꋊꇧꎭ,ꒃꅐꃅꐙꌠꁧꃤꃅꑘꐮꉔꀻꎆꌠꄹꎆ。ꐳꃅꐥꐨꃅꐙꌠꁧꃤꃅꑘꀉꑌꑵꃅꀻꎆꌠꉺꏦꄻꐛꒆ。ꇢꈴꁧꃤꃅꏲꉻꏦꇗꄹꏦꉻꑫꄻꐛꒆ,ꇢꈴꁧꃤꃅꏲꉻꀋꎪꏤꁨ、ꏦꈴꄉꆽꎍꌠꃅꇫꑟꌠꊥꎆ。

（11）ꐛꏀꈴꅉꃀꉁꈾꋈꄻꏦꉻꉺꏦꄻꐛꒆ。ꀊꏀꉹꌠꅉꃀꉁꈾꄐꎖꌠꌋꆀꎕꏦꉻꑫꏓꄻ,ꀊꏀꉹꌠꅉꃀꉁꈾꐮꉔꌬꈧꉺꏦꄻꐛꒆ，ꋊꃅꐥꌠꅉꃀꉁꈾꃷꁨꈴꄺꀱꌠꄹꎆ,ꀉꑌꑵꃅꐙꌠꎆꇱꎆꊙꈴꈜꍔꐯ,ꀉꒉꀊꂾꌠꅉꃀꉁꈾꋈꄻꋮꄮꉺꏦꄻꐛꒆ。ꃹꅼꃅꏓꇱꈭꈜꎞꎭꉻꑫꄺꀱ,ꎸꈜꏦꉻꄺꀱꌠꄹꎆ，ꌬꈴꃅꈯꈴꌠꌋꆀꃅꈯꀁꂥꎆꏣꀻꎆ, ꁌꎴꄇꈜꏱꁈꄻꃪꌠꄹꇙ。ꎿꇬꎞꎭꄜꏂꀧꀧꃅꄐꊋꌋꆀꅉꆺꑭꊂꁧꃤꃅꑟꐨꉀꐕ,ꎿꌤꇢꆣꇽꄹꏦꏤꏦꏀꀺꌠꄹꎆ。ꈲꒉꋉꃆꀉꒉꀊꂾꌠꋈꄻ、ꃄꌬ、ꏲꂠꉺꏦꄻꐛꒆ。

（12）ꅐꑘꊛꏣꇲꁵꊛꏣꍕꎇꐨꌋꆀꋬꂻꑟꐨꉀꐕꄹꏦꄻꐛꒆ。ꐳꃅꑴꌅꋎꍅꉆꌠꅐꑘꊛꏣꇲꁵꊛꏣꄺꑣ,ꏓꐛꄆꈜ、ꇮꑘꏸꐕꀋꃀ、ꆅꉁꉁꈾ、ꌬꇐꎖꅍ、ꅉꃀꆓꎊ、ꇮꑘꆓꎊ、ꂴꅑꌬꇐꑠꀋꉬꀋꉆꌠꅐꑘꊛꏣꀻꎆꌠꏦꉻꉺꏦꄻꀉꇨꄻꐛꒆ,ꊛꏣꈁꐥꌠꃅꇮꇐꈢꇓꀖ、ꊌꐨꌫꄻꌠꄹꎆ。ꒃꅐꊛꏣꇲꁵꊛꏣꋬꂻꃨꆰꐨꄤꎖꌋꆀꊜꄻꉺꏦꄻꐛ。ꅐꑘꇩꈐꊐꄳꊱꁨꃅꆹꏮꌠꐊꃅꉺꏦꄻꐛꒆ,ꏭꅐꃄꅉꌋꆀꊪꊛꃄꅉꈲꁧꐯꇯꊌꌠꄹꇙ。ꇩꏤꄐꇐꏤꁈꈯꄔꃅꄷꌋꆀꀋꉬꀋꉆꌠꅐꑘꄐꌬꌠꋈꄻ。ꐳꃅꇩꏤꊭꊎꉻꑫꄻꐛꒆ。ꄐꇐꏤꁈꃅꐙꌠꇑꅐꇐꅐꀦꎹꄻꒃꅐꇲꁵꊭꊎꃷꄻꌠꏓꇲꌋꆀꐯꊛꉻꑫꄻꐛꒆ。

ꇖ、ꐊꑷꃅꏀꀺꌠꇬꊋꁈꄏꌠꏦꉻꉺꏦꏓꄻ

ꂘꑘ、ꈆꑪꇮꇐ、ꌧꊿꆹꍏꇩꃤꐛꏀꈴꌠꅉꃀꃅꐙꌠ、ꄐꇐꏤꁈꃅꐙꌠꄘꄏꅍꉬ。ꀋꎪꃅꃹꅼꃅꈆꑪꂘꑘꌌꇩꏤꄖꄑꌄꆣꌠꄐꇐꏤꁈ、ꌧꊿꌌꇩꏤꋈꄻꀉꇨꎻꌠꄐꇐꏤꁈ、ꏀꀺꌠꌌꀻꎆꌠꅸꇙꌠꄐꇐꏤꁈꃄꌬ,ꏓꇲꄉꂘꑘꈆꑪꇮꇐꌧꊿꏦꉻꉺꏦꏓꋍꃱꃅꄺꀱꌠꄹꎆ,ꀊꏀꉹꌠꇩꏤꑭꊂꏦꉻꄻꐛꒆ,ꇩꏤꏀꀺꉻꑫꉻꄜꂿꄐꉀꐕ。

（13）ꃹꅼꃅꂘꑘꏓꇱꄺꀱ。ꐳꃅꊇꁧꀊꂥꌠꂘ꒧ꉻꑫꋈꄻ,ꏓꇲꄉꊿꉘꄟ、ꌶꅉꀞꈁꏦ、ꏲꂠꏦꉻ、ꏦꀧꉺꏦꄺꀱꌠꄹꎆ。ꃅꇏꄻꊿꉙꂘꉺꏦꄻꐛꒆ,ꒉꐧꐭꌶꅉꉪꇐꍔꍞꌷꇐꋍꃱꃅꄺꀱꏀꀺꌠꄹꎆ,ꑌꇐꌧꇐꈯꎟꋽꇐꑘꃅꌠꐊꑷꃅꉘꉚꌠꉻꑫꄻꐛꒆ，ꂘꃀꂘꄻꉙꂘꄐꊋꉀꐕ,ꂘꃀꑌꇐꑲꇐꋈꄻꌠꎴꈲꉺꏦꄻꐛꒆ,ꃹꅼꃅꂘ꒧ꈋꍣꌠꄺꀱ。ꀊꂥꊐꌠꂘꑘꄐꉻꄻꃪ，ꐳꃅꍏꇩꐛꐨ、ꋧꃅꀨꏠꌠꄊꑪꌋꆀꂱꎆꅑꌠꌷꑫꋈꄻ。ꉹꁸꄉꒉꌶꅉꄺꀱꌠꄹꎆ,ꈆꑪꇮꇐꀻꎆ、ꇩꏤꄐꇐꏤꁈꈉꐨꌌꈻꏁꌠꌷꑫꋊꄻꉺꏦꌋꆀꌧꊿꉘꉚꈁꏦꄻꄉ，ꎃꐚꄩꐂꄉꈉꊸꌷꑫꌐꑘꄐꄻ,ꊋꀥꇱꄉꅉꃀꌷꑫ、ꏀꄓꌷꑫ、ꐯꏍꌷꑫꋈꄻꌠꌋꆀꂴꅑꌧꊿꉘꉚ,ꊋꇤꄉꏀꀺꄐꊋꉘꉚ。ꌶꅉꀊꂥꊐꌠꈆꑪꇮꇐꏀꀺꉺꏦꄻꐛꒆ,ꊌꐨꆹꏮꇿꋌꉀꐕ。ꀉꇨꃅꈆꑪꇮꇐꂘꑘꌋꆀꃰꊿꁱꀕꂘꑘꋮꄮ。ꐳꃅꃅꑘꂘꑘꎃꐚꂘꑘꐮꈴ、ꅐꑘꂘꑘꐮꉔꌠꃅꑘꂘꑘꉻꑫꏓꄻ。ꌶꌺꃅꉚꃄꄻꄹꏦꄻꐛꒆ。ꉹꁌꀞꄻꂘꑘꀻꎆꌠꋊꍬꄐꏁ。ꑞꅉꀊꂥꌠꂘꑘꁉꃑꌠꄹꎆ,ꇩꉈꑞꅉꀊꂥꌠꅿꇪꉹꌠꒉꌶꅉꍏꇩꄉꐮꇷꌶꅉꀞꇁꌠꊋꊡ。

ꃄꁕꂘꑘꌬꇐꅐꀦꁆꄻꌠꄻꃪ,ꊻꂷꐛꐈꌠꌋꆀꐮꄉꄐꌠꅉꀨꄉꉻꂘꑘꁧꃤꃅꇲꁵꉺꏦꋈꄻ。ꋭꑘꂘꑘꊈꂄꐮꆽꏣꌠꄹꎆꉺꏦꄻꐛꒆ,ꋍꁘꋍꁘꃅꁌꀋꈁꂘꑘꈍꈐꍔꒉꌠꎹꎥ。ꌷꂾꂘꑘꌋꆀꐋꀋꌡꂘꑘ、ꌐꄉꂘꑘꏦꀧꉺꏦꄻꐛꒆ。ꂘꑘꃷꂷꈴꌠꄹꎆ,ꌶꄻꉹꌠꐧꋦꋈꄻꌠꇬꊋꇱ,ꊋꀥꇱꄉꐥꍂꂘꑘꏦꀧ。

 （14）ꃹꅼꃅꈆꑪꇮꇐꏦꉻꄺꀱ。ꋧꃅꈆꑪꇮꇐꂴꅑꌠꏭꉜꄉ、ꎆꏣꎹꄻꅉꀋꉬꀋꉆꌠꏭꉜꄉ、ꇩꏤꈉꐨꀉꒉꀊꂾꌠꏭꉜꄉ、ꏓꂱꀑꇬꋬꂻꌠꏭꉜꄉꃅꇬꎷ，ꀉꒉꀊꂾꌠꈆꑪꇮꇐꏀꀺꊥꇫꉺꏦꄻꃪ,ꏓꇲꄉꀉꇨꃅꀋꉬꀋꉆꈯꄜꇮꇐꈢꇓꀖ,ꈆꑪꇮꇐꏀꀺꊋꃤ、ꐊꊈꁆꄻ、ꌧꊿꁥꌠꉻꑫꈴ、ꄹꏦꈴ、ꋮꄮꈴꌠꄹꇙ。ꊋꀥꇱꄉꇩꏤꄐꇐꏤꁈꈆꑪꇮꇐꊋꃤꋈꄻ,ꇩꏤꋒꃯꉜꅉꉻꑫꄻꐛꒆ，ꇩꏤꈆꑪꎥꃪꏲꉻ、ꑞꅉꀊꂥꌠꎥꃪꉹꌠꒉꌶꅉ、ꈆꑪꇮꇐꂴꅑꎆꏂꑘꉆꈉꌋꆀꄐꉻꄻꃪ,ꈆꑪꇮꇐꏀꀺꌠꍏꑷꌋꆀꃅꄷꋮꄮꌠꄹꎆ，ꋍꑞꋍꉹꈆꑪꇮꇐꏀꀺꁦꄻꐽꈉꋈꄻꌠꏓꇲ,ꀊꏀꉹꌠꎥꃪꀖꁉꏲꉻꀻꎆꌠꊋꊡꌋꆀꋊꍬ，ꉪꇩꏤꄉꈁꀉꒉꐯꀉꒉꌠꃷꎏꄐꏁꂿꄐꋊꇤ,ꊋꀥꇱꄉꏀꀺꌬꇐꅐꀦꏓꇲꌋꆀꊋꃤꊥꇫ,ꈆꑪꇮꇐꏀꀺꌠꌋꆀꅐꑘꏀꀺꌠꐮꉔꀻꎆꌠꄹꇙ。ꈆꑪꇮꇐꋬꂻꃨꆰꐨꍞꎖꌗꋏꌠꌋꆀꊜꄻꉻꑫꏓꄻ,ꊋꀥꇱꄉꈆꑪꇮꇐꅉꃀꇎꏦꑴꌅꏦꀧ。ꈆꑪꇮꇐꐧꋦꏓꉻꏲꂠꄹꏦꄻꐛꒆ。ꇩꏹꈆꑪꇮꇐꐮꈴꇷꃅꌠꍔꐯ,ꍏꇩꄉꇩꏹꈆꑪꇮꇐꎀꍹꄻꌠꊋꊡ,ꌶꅉꀊꂥꊐꌠ、ꈆꑪꎥꃪꑼꌙ、ꈆꑪꇮꇐꐧꋦꏓꉻꉇꉻꏭꌐꑘꐮꈴꇷꃅꌠꏲꂠꉺꏦꄻꃪ。

ꈆꑪꇮꇐꎖꄎꏲꂠꌠꄻꃪ,ꅉꃀꎥꃪꁁꏯ、ꐯꏍꂴꅑꁁꏯ、ꀋꉬꀋꉆꁁꏯꂴꂿꐨ、ꄐꏁꐨꐥꌠꄐꉻꄻꀉꇨ。ꊥꇬꐨꐥꃅꅉꃀꎥꃪꌠꊋꀥꇱ,ꈆꑪꇮꇐꌫꎆꌌꅉ꒜ꎥꃪꇬꌬꌠꍆꁧꉀꐕ,ꋓꅔꉹꌠꊋꁈꄏꌠꌋꆀꎍꐽꃅꊋꁈꄏꌠꐮꐊꐙꌠꅉ꒜ꎥꃪꎆꊐꉺꏦꄻꐛꒆ，ꇎꏦꐥꌠꃅꄷ、ꎆꏂꑘ、ꐧꋦꎀꍹ、ꂶꄜꊿꊋꊡꄉꅉ꒜ꎥꃪꌠꊋꁈꄏ,ꅉ꒜ꎥꃪꅇꀨꌋꐨꀉꑌꑵꃅꐙꌠꊋꁈꄏ,ꃨꆰꐨꀊꂥꌠ、ꁌꐨꀊꂥꌠꅉ꒜ꎥꃪꌠꊋꊡ。ꃹꅼꃅꈆꑪꇮꇐꉉꍣꉻꑫꄺꀱ,ꊋꀥꇱꄉꈆꑪꇮꇐꇗꏦꏱꄻ,ꏟꈯꃅꌷꇐꃅꇏꀋꉾꌠꏱꄻ。

ꎆꏂꑘꈆꑪꇮꇐꏀꀺꀨꄜꉆꈉꄻꀉꇨ,ꈆꑪꇮꇐꂴꅑꌠꎆꏂꑘꉺꏦꉘꉚꋈꄻ,ꊋꀥꇱꄉꎆꏂꑘꀨꇺꌠꅐꌷꎥꃹꅼꃅꐮꐊꎻ,ꎆꏂꑘꎥꃪꀖꁉꊭꄎꎆꄹꏦꄻꄉ,ꎆꏂꑘꊋꁈꄏꌊꑴꇙꃅꂴꅑꄉꇩꏤꈆꑪꇮꇐꈢꇓꀖꂿꃆꃅꅀꇫꃅꈽ。ꌐꌃꋲꏀꌠꐧꐭꎆꏂꑘꀻꎆꀉꇨꌠꊥꎆꉺꏦꏓꄻ。ꈆꑪꇮꇐꉹꌠꐧꐭꎆꏂꑘꊋꊡꄉꎥꃪꀖꁉꌠꇬꎆꀉꒉꃅꇱ,ꎥꃪꀖꁉꌫꎆꇱꈎꇧꎭꌠꍆꁧꉀꐕ。ꌶꅉꀊꂥꊐꌠ、ꈆꑪꎥꃪꑼꌙꊋꊡꌋꆀꄐꏁꄉꂴꌫꄻꊁꎆꁵꌠꃄꄟꇬꈴꄉꈆꑪꇮꇐꊌꐨꈌꁧꐧꐭꎆꏂꑘꁳꌬꈧꎻ。

ꍏꑷꏱꎆꈆꑪꇮꇐꌫꎆꁷꄻꌋꆀꏲꂠꌬꈧꉺꏦꄻꐛꒆ,ꍏꑷꏱꎆꈆꑪꇮꇐꎖꄎꃄꌬꌋꆀꌐꑘꏲꉻꏲꂠꏦꉻꄻꐛꒆ。ꏱꎆꈆꑪꎥꃪꐘꃆꌫꎆ“ꀧꈘꄹꏦ”ꈍꈐꍔꒉ, ꀊꅰꀉꒉꌠꇮꇐꈛꏦꏤꇽꌅꈌ、ꀊꅰꀉꒉꌠꌫꎆꁆꄻꌅꈌ、ꀊꅰꀉꒉꌠꌬꇐꇁꀦꋊꄻꌅꈌꄻꈆꑪꌧ꒜ꁵ。ꌧꃀꂓꃶꐚꄀꄉꌊꄻꎼꇁꌠꉜꐨꐯꀋꐊꌠꐘꃆꌊꄻꉺꏦꄻꄉ。ꈆꑪꎥꃪꉹꌠꌤꑘꌤꃅꅉꁳꎃꐚꌠꌤꑘꌤꃅꅉꏭꀋꋌꃅꀊꅰꃅꋭꋽꌠꏲꂠꄹꏦꃄꌬꄉ,ꎆꏂꑘꏭꃅꏲꂠꌠꃅꌠꎹꎥ。

ꃹꅼꃅꈆꑪꇮꇐꊌꐨꆹꏮꉺꏦꄺꀱ,ꊋꀥꇱꄉꇩꏤꇮꇐꆹꏮꉻꑫꋈꄻ，ꐳꃅꉪꉻꎕꊪ、ꐧꀠꃅꉚꌠꎕꊪꐽꈉꈨꄐꄻꄉ,ꉘꃀꇶ（ꋬꈭ）ꌠ、ꇬꂾꁥꃢꌠ、ꇬꂾꑵꌠꃢꌠꌫꄻꏱꁈꄻꐛꒆ，ꍔꃚꃻꄻꑴꌅꏀꀺꅐꇐꊋꃤꀉꒉꃅꇱ。ꊋꀥꇱꄉꇮꇐꏱꄻꊿꁥꌠꂘꄻ。

ꈆꑪꇮꇐꌤꃅꊿꁳꈆꑪꇮꇐꊌꐨꆹꏮꊌꐨꁷꄻꀂꏽꆏꑴꌅꌅꈌꀊꅰꀉꒉꃅꐥꎻ,ꄉꅍꈆꑪꇮꇐꊌꐨꁨꇐꐚꀕꃅꁵꄻꌠꏲꂠꄹꏦꄻꄉ,ꃹꅼꃅꄉꅍꈆꑪꇮꇐꊌꐨꌅꈌꁵꌠꄺꀱ。ꃹꅼꃅꌶꅉꀊꂥꊐꌠ、ꈆꑪꎥꃪꑼꌙꊌꐨꁷꄻꄺꀱ。ꇎꏦꇬꊒꌠꇩꁨꎆꏂꑘꀊꅰꀉꑌꌠꁳꏀꀺꀹꄻꌠꌌꍝꄎꅍꃅꄉ,ꈆꑪꇮꇐꎥꃪꊿꏭꇶꏦꀉꑌꑵꃅꀊꉗꃅꊋꊡꌠꃅꉆ。

ꈆꑪꇮꇐꏀꀺꌠꌋꆀꐮꄉꄐꌠꈆꑪꇮꇐꎆꒉꎆꇁꏦꉻꄻꄉ,ꊋꀥꇱꄉꇩꏤꈆꑪꇮꇐꂿꃆꀉꒉꀊꂾꌠꌋꆀꈆꑪꇮꇐꉹꌠꐧꐭꎆꏂꑘꏭꎆꒉꎆꇁꊋꁈꄏ,ꀊꉗꌠꎆꀨꏛꃅꇱ、ꀄꊭꃅꇱ、ꀊꉗꃅꇱ、ꈆꑪꇮꇐꀉꇨꌠꇬꇱꌠꊋꁈꄏꌠꏱꁈꄻꐛꒆ。ꀉꒉꀊꂾꌠꇮꇐꈢꇓꀖꃨꆰꐨꁗꏒꉺꏦꄻꐛꒆ,ꈆꑪꇮꇐꄜꏂꀧꏱꁈꉻꑫꄻꐛ。ꉇꎆꍏꇩꄉꇴꍆꌅꈌꐥꌠꇬꎆꇱ、ꐔꈔꉆꐨꎆꇱꌠꃅꌒꐨꉀꐕ。

（15）ꃹꅼꃅꌧꊿꀻꎆꏦꉻꉺꏦꄺꀱ。ꀊꅰꃅꏣꀋꑌ、ꀊꅰꃅꁉꃑ、ꀊꅰꃅꇿꋌꐥꌠꌧꊿꏱꁈꃄꌬ，ꌧꊿꑴꌅꉘꉚꉺꏦꄻꐛꒆ,ꐳꃅꇩꏤꌧꐨꀊꂥꌠꌧꊿꀊꂥꅉꌋꆀꌧꊿꊙꎷꏓꋧꐽꈉꋈꄻ。ꐳꃅꇩꏤꄐꇐꏤꁈꌧꊿꊋꃤꋈꄻ,ꊋꇤꄉꄐꇐꏤꁈꈆꑪꌧꃀ、ꀨꏠꌠꈆꑪꇮꇐꂴꅑꌧꊿꌋꆀꏀꀺꉻꁥꉘꉚꂘꄻ,ꊋꇤꄉꋉꃆꌧꃀꄞꅐꌠ、ꇩꏤꀉꒉꇮꃀ、ꇮꇐꄐꁈꀊꂥꌠꌧꊿꉘꉚꂘꄻꅐꇁ,ꋍꑞꋍꉹꌧꊿꊇꁧꉀꐕ。ꀨꏠꌠꅐꑘꇮꇐꇮꃅꊿꁥꂘꄻ。ꌧꊿꊱꁨꃅꏮꈴꌠꉺꏦꄻꐛꒆ,ꌧꊿꃄꁕꋭꋽꃅꄐꄻꌠꊥꎆ,ꃹꅼꃅꁭꅐꈯꄔꁮꐚꃅꄷꌧꊿꐊꃅ。ꌠꏀꏀꀺꌧꊿꌋꅜ、ꌊꄻ、ꂘꄻꌠꉺꏦꄻꐛꒆ,ꀊꅰꉾꃪꃅꌠꏀꈆꑪꇮꇐꃅꊿꊌꐨꏦꀧ。ꈆꑪꇮꇐꎥꃪꊿꉌꊢꃅꈆꑪꎥꃪꌠꄹꏦꄻꐛꒆ。

ꌧꊿꊋꊡꉺꏦꄻꀉꇨ,ꀋꎪꃅꊿꌬꀨꄜꏭꌅꈌꁵ、ꌧꊿꎁꃅꄝꏯꌠꌭꈬ。ꏀꀺꄐꊋ、ꊇꁧ、ꃶꐚꇿꋌ、ꑆꊋꅐꌞꌠꌌꍝꄎꅍꃅꄉꌠꌧꊿꈋꍣꉻꑫꋈꄻ。ꒉꌶꅉ、ꈆꑪꎥꃪꑼꌙꌋꆀꎆꏂ꒧ꌧꊿꐮꎻꈴꈴꈜꀺꐮꈴ。ꇩꉈꌧꊿꊙꎷꌊꇁꌠꊋꁈꄏꏦꀧꉺꏦꄻꐛꒆꄉ,ꇩꏹꋓꅔꊋꃤꐥꌠꌧꊿꄹꏦꉻꑫꏓꐛ。ꇮꇐꀊꂥꌠꌧꊿꀀꇙꄹꏦꎹꎥꋈꄻ。

ꉬ、ꉻꒉꎆꏣꏱꄻꉻꑫꄻꐛꒆ

ꈆꑪꃅꐙꌠꉻꒉꋊꐽ、ꇿꋌꐥꌠꍔꃚꏱꄻꌠꆹꐧꋦꉪꏦꃷꎏꎆꏣꏦꉻꂱꎆꅑꌠꋊꇤꅐꇁꌠꈏꇓꇖꐨꉬ。ꀋꎪꃅꉻꒉꋊꐽꄹꏦꉻꑫꄻꐛꒆ,ꏓꇲꄉꏱꎆꇗꏸ、ꎆꒉꎆꇁꑠꀋꉬꀋꉆꁁꏯꄺꀱꌠꄹꎆ,ꉻꒉꏱꁈꌬꐨꋍꃱꃅꐙꌠꄻꀉꇨ。

（16）ꇩꏤꄐꇐꏤꁈꄐꎖꉻꑫꌋꆀꏱꁈꏓꇲꋮꄮꉺꏦꄻꐛꒆ。ꇩꏤꄐꇐꏤꁈꏤꄻꌋꆀꃄꌬꉺꏦꏓꄻ,ꇩꏤꀉꒉꀊꂾꌠꄐꇐꏤꁈꃹꅼꃅꐮꉔꌠꊋꀥꇱ,ꇩꏤꄐꇐꏤꁈꉻꒉꄐꏁ、ꏓꇲꋮꄮꄐꊋꄻꀉꇨ。ꇩꏤꎆꏣꐧꋦꀻꎆꄐꎖꄹꏦꉻꑫꄻꐛꒆ,ꄐꎖꐯꊛꌠꃅꇫꑟꉺꏦꄻꀉꇨ，ꇩꏤꀻꎆꄐꎖꄐꇐꏤꁈꍝꄎꂿꄐꋊꇤ,ꇩꏤꃄꅉꈥꈉꄐꎖꅉꃀꂿꄐꄻꀉꇨ，ꌐꐘꄐꎖꌋꆀꃄꁕꄐꎖꃄꌬꌠꄘꄏꂿꄐꄻꀉꇨ。ꌧꃀꄉꉻꁈꏤꈽꌠꄹꏦꄻꐛꒆ。

ꇩꏤꀻꎆꄐꎖ、ꄐꇐꀉꒉꀊꂾꌠꃄꌬꌠꇬꆼꒆꄉꏱꎆ、ꎆꃀ、ꅐꑘ、ꁌꏤ、ꃅꑘꊌꑠꏱꁈꋮꄮꃅꊋꇤꌠꊥꎆ,꒔ꑞ꒔ꉹꁦꎆꃷꁨꅐꀦꁆꄻꌠꌋꆀꊭꊎꃷꁨꐛꉻꋊꄻꌠꄻꃪ。ꇩꏤꉻꒉꁨꇐꎝꁯꑴꉻꏲꂠꌠꎹꎥꃄꌬ。ꎆꏣꏱꁈꌋꆀꎆꏣꃅꐙꌠꏱꁈꀋꉬꌠꐯꇯꌌꉻꒉꏱꁈꌊꄻꃅꍜꇬꇱꄉꐯꌟꃅꈋꍣ。ꉘꇉꄉꌠꏲꂠꉺꏦꄻꐛꒆ。ꊇꁧꀊꂥꃅꀻꎆꌠꇬꄘꄏꌠꏓꌗꌐꁧꍤꌗꉻꑫꄻꐛꒆ,ꊋꀥꇱꄉꎆꏣꀊꏀꁁꏯꀊꏀꌠꌌꏓꌗꅉꇬꇱꌠꉱꑷ。ꊋꀥꇱꄉꅐꑘꃅꈧꌤꃅꅉꏓꌗꌠꅉꃀꋈꄻ,ꊝꀯꌋꆀꁷꐞꏲꉻꏓꌗꏡꁈꄻꃪ,ꋍꁘꋍꁘꃅꀰꏢꀨꄜꃅꈧꌠꅏꅉꏓꌗꌠꄹꌬ。ꇩꏹꉻꒉꎆꏣꏱꁈꋮꄮꉺꏦꄻꐛꒆ。

（17）ꃹꅼꃅꏱꎆꇗꏸꏦꉻꄺꀱ。ꄐꌗꄹꏦꄻꐛꒆ,ꊋꀥꇱꄉꏱꎆꅐꀦꌋꆀꄐꌗꋍꃱꃅꄐꏤ,ꏲꑘꌅꈌ、ꍔꃚꉌꒊ、ꇩꁨꅐꀦꁨꇐꇬꉘꇉꄉꊌꌠꊌꐨꉬꇮꃅꌌꍔꃚꄐꌗꏲꂠꅉꇬꇱꌐ。ꇩꁨꎆꀨꀰꏢꄐꌗꌠꌋꆀꃅꐨꇿꋌꉉꍣꄹꏦꄻꐛꒆ,ꇩꏤꄐꇐꏤꁈꂿꃆꀉꒉꀊꂾꌠꌋꆀꅉꀨꉹꁌꐥꐨꎆꊋꏦꀧꌠꄻꀉꇨ。ꄐꌗꁰꄻꌋꆀꏱꎆꏱꁈꉻꒉꄐꂘꌠꄻꀉꇨ。ꊋꀥꇱꄉꄉꉻꁧꃤꃅꃅꊌꐨꇿꋌꏲꂠ,ꌤꂾꄐꊋꈋꍣꄤꎖꌠꄻꀉꇨ。ꃹꅼꃅꅉꃀꀋꐥꄐꌗꌠꄺꀱ。ꄐꌗꁆꄻꌅꈌꏓꋍꃱꃅ,ꄐꌗꏲꂠꌠꋍꃱꃅꐙꐨ、ꏦꐛꃅꐙꐨꉀꐕ,ꄐꌗꄇꄜꋊꌋꆀꍞꊟꄹꏦꄻꐛꒆ。ꌅꈌꃅꎁꅐꇁꄹꏦꍔꃚꏓꇱꄉꏱꎆꅇꄜꄹꏦꄻꐛꒆ。

ꊇꁧꀊꂥꃅꀻꎆ、ꐧꋦꐽꊯ、ꃷꎏꏓꋍꃱꃅꌠꇬꈲꏣꐥꌠꇗꏸꎴꄹꏦꄻꐛꒆ,ꇗꏸꄹꏦꐛꉻꄻꃪ。ꏀꄓꅐꑘꐛꄟꌋꆀꐮꄉꄐꌠꇗꏸꎴꄹꏦꎥꃪ。ꐊꑷꃅꇗꏸꎴꏦꏤꏥꏦꃅꇫꑟ,ꇗꏸꎴꈲꁵꏱꁈꋊꍬ,ꀋꉬꀋꉆꁁꏯꌋꆀꈭꊭꀋꉬꀋꉆꌠꏭꊋꁈꄏꉺꏦꄻꐛꒆ。ꈛꎂꇗꏸꉻꑫꄻꐛꒆ,ꏓꇱꌋꆀꉹꁸꐮꐊꐙꌠꊨꏦꊌꐨꇗꏸꄹꏦꄻꐛꒆ,ꀰꏢꈁꊌꌠ、ꎆꀨꈁꊌꌠ、ꁨꇐꈁꊌꌠꇗꏸꎴꏱꁈꋊꍬ,ꑘꃅꐨꐥꃅꈁꊌꌠꏓꋍꃱꃅꇗꏸꎴꌠꃄꌬ。ꃹꅼꃅꇗꏸꎴꏲꌠꄺꀱ。

ꌅꈌꃅꎁꊨꄅ、ꎆꊋꋮꄮ、ꃄꁕꐮꆽꏣꌠꍏꑷꌋꆀꃅꄷꏱꎆꐮꃆꂮꄻꐛ。ꃅꄷꑴꌅꎆꊋꁦꎆꇱ,ꃅꄷꇗꏸꇁꀦꍔꐯ,ꄉꄐꃅꃅꄷꇗꏸꎴꏲꌅꈌꑞꅉꍔꒉ。ꏱꎆꆹꏮꎆꁵꉻꑫꄻꐛꒆ,ꌐꐘꆹꏮꎆꁵꌠꎵꄻꋊꍬ,ꎃꐚꃅꐙꌠꆹꏮꎆꁵꌠꁦꎆꇱ,ꏃꑤꎆꊋꌋꆀꌤꃅꌅꈌꐮꄉꄐꌠꑞꅉꉀꐕ。ꊇꁧꀊꂥꃅꀻꎆꌠꇬꊥꎆꌠꆹꏮꎆꁵꊋꊡꏢꑲꉺꏦꄻꐛ。ꌬꈧꇗꏸꎳꄻꈭꊭꄯꊁꄉꄷꀋꁧꎍꐽꃅꏮꃅꄷꁵꌠꄹꎆ，ꁌꎆꇗꏸꊏꋊꇗꏸꈪꏱꁈꌋꆀꄂꈎꊛꏣꄻꐛꒆ,ꐯꇯꈲꊌꌠꇗꏸꈲꊌꍆꁧꄻꉾꃪ。ꇓꈓꀧꌋꃅꋈꄻꇗꏸ、ꂘꑘꌫꎆꁥꇱ、ꃅꄷꂘꑘꁥꇱꌠꏓꇱꌊꃅꄷꁥꇱꇗꏸꃅꄉꌠꎥꃪ,ꌅꈌꄻꃅꄷꁵꄉꊼꇅꄉꄐꌠꈐꇬꇗꏸꍆꐪꑭꋧꌬꉆꐨꏤꄻꎻ。ꄉꄐꃅꃅꄷꍔꃚꌐꐘꎝꃆꊫꌐꊋꁈꄏꈍꈐꍔꐯ,ꄉꄐꃅꌌꌬꈧꎆꀨꃅꄉꁁꏯ、ꄉꈁ、ꍆꁧꍔꒉ。ꍔꃚꎝꃆꏲꂠꄹꏦꄻꐛꒆ,ꈁꉬꐯꌟꌠꃅꄷꎝꃆꍞꎖꍞꏲꉻꑫꌋꆀꂁꐥꎝꃆꃨꆰꐨꄴꏮꋊꑣꌠꎴꈲꉺꏦꄻꐛ,ꐳꃅꃅꄷꎆꏓꎆꊭꐽꈉꄺꀱꆹꏮ。ꇗꏸꀋꉬꌠꊌꐨꏲꂠꌠꋊꍬ,ꄉꄐꃅꇗꏸꀋꉬꌠꊌꐨꏱꄻꌅꈌꀁꋌꃑ,ꄻꃅꄷꁳꃶꐚꐛꐨꇬꉜꄉꐯꀋꌡꃅꏲꂠꎻ。

ꄉꄐꃅꍏꑷꌤꆿꌅꈌꊋꀥꇱ、ꍏꑷꏱꎆꌬꐨꍆꐪꉀꐕ。ꍏꑷꏱꎆꌤꆿꌅꈌꏥꏦꃅꇬꍏꑷꋋꊐꌠꇬꈴꄉꌬꐨꄐꁆ,ꃅꄷꁠꄀꄉꎃꃅꌠꍏꑷꏱꎆꌤꆿꌅꈌꊨꒊ。ꏤꐪꐆꄉꃅꄷꏭꁥꇱꎆꀨꄐꁆꄷꇖꀋꉆ,ꃶꐚꃅꃅꄷꁠꄀꄉꌤꆿꌅꈌꃄꌬꈇꌠꆏ,ꌐꐘꆹꏮꎆꁵꌠꇬꈴꄉꎆꃀꄐꁆ。

（18）ꃹꅼꃅꎆꒉꎆꇁꏦꉻꄺꀱ。ꐳꃅꍏꑷꑴꉴꄹꏦꄻꐛꒆ,ꎆꃀꏱꁈꊪꈴꉺꏦꄻꁣꀋꐥꃅꄉ。ꏣꀋꑌꃅꈆꑪꇮꇐꎆꒉꎆꇁ、ꀊꃴꎆꒉꎆꇁ、ꁊꈲꎆꒉꎆꇁ、ꃀꌠꀨꎹꎆꒉꎆꇁ、ꃷꂷꎆꒉꎆꇁꀻꎆ，ꊋꀥꇱꄉꄐꇐꏤꁈꀉꒉꀊꂾꌠ、ꀋꉬꀋꉆꁁꏯ、ꊋꁧꈭꊭꇬꊈꂄꌠꎆꒉꎆꇁꁧꃤꃅ。ꎆꒉꎆꇁꏲꉻꉆꈉꏤꄻꌋꆀꏱꄻꌠꄻꐛꒆ,ꐥꄜꎆꏣꁧꃤꃅꌠꊋꊡꏢꑲꉺꏦꄻꐛꒆ。ꀉꑌꑵꃅꇴꍆꌅꈌꎆꏓꌠꀻꎆ,ꐳꃅꀉꑌꊐꃅꐙꌠꎝꃆꊫꌐꃷꎏꀻꎆ,ꈛꎂꃅꎆꏓꌠꍆꁧꉀꐕ。ꇩꁨꎆꒉꎆꇁꎆꀨꏲꂠꏦꉻꄻꉾꃪ。

ꎆꇱꌠꌋꆀꎆꏓꌠꐮꋮꄮꌠꎆꀨꃷꎏꄐꊋꄻꐛꒆ,ꐔꈔꉆꐨꄴꏮ、ꀉꇨꃅꍞꏲ,ꎆꀨꃷꎏꉾꃪꎍꐽꃅꀻꎆꌠꊥꎆ。ꀊꉗꃅꎆꀨꌌꃷꎏꇬꃹꌠꊋꁈꄏ。ꃷꎏꃹꇬꌦꊇꁧꉀꐕ,ꃷꎏꃹꇬꌦꍞꏲꌋꆀꃷꎏꇬꄉꎞꅐꁧꌠꄹꏦꄻꀉꇨ。ꎆꀨꃷꎏꈏꇓꎍꐽꐨꄻꀉꇨꌠꎴꈲꉺꏦꄻꐛ。ꇴꀉꒉꍆꌋ、ꃶꐚꃅꋏꌫꊿꃅꐨꋊꍬꏢꑲꉺꏦꄻꐛꒆ。ꃷꎏꃹꇬꌦꍍꊱꁸꊋꊡꏢꑲꉺꏦꄻꐛꒆ。ꎆꇱꊿꀧꌋꃅꉺꏦꄻꐛꒆ。ꃄꁕꐨꐥꌠꇴꍆꌅꈌꃷꎏꏤꏦꐯꊛ、ꎕꏦꋍꃱꃅꌠꄹꇙ。

ꎆꒉꎆꇁꏦꃤꏤꄻ。ꎆꒉꎆꇁꍞꏲꉻꑫꄻꐛꒆ,ꏦꃤꇬꈴꄉꎆꒉꎆꇁꈁꃅꈧꌠꌌꍞꏲꌠꇬꇱꄉ,ꍞꏲꆽꎍꐨꌋꆀꅑꎹꄹꏦꄻꀉꇨꃅꄉ,ꍏꑷꌋꆀꃅꄷꍞꏲꋮꄮꌠꊋꀥꇱ。ꋬꂻꇿꋌꀉꒉꌠꎆꒉꎆꇁꅉꃀꉁꈾꋈꄻ,ꎆꒉꎆꇁꃷꎏꁱꄀꁠꏲ、ꌗꏢꍤꌗꏤꋪꄹꏦꏓꋍꃱꃅ,ꃨꆰꐨꏛꃅꄺꀱꀉꇨꃅꏢꑲꌠꄹꏦꄻꐛ，ꇿꋌꐥꃅꉻꑫꐨꐥꌠꐔꈔꉆꐨꄴꏮꋎꍅꌠꎆꒉꎆꇁꎍꐽꌠꏦꀧꉻꑫꄻꈫꈈ。ꎆꒉꎆꇁꌬꈧꊿꀧꌋꃅꌠꌋꆀꏦꃤꇬꀋꈴꃅꎆꒉꎆꇁꃅꈧꌠꏭꇇꇩꍈꌠꉺꏦꄻꐛꒆ,ꅐꑘꎆꀨꌋꆀꎆꒉꎆꇁꎆꀨ“ꄔꁿꊖꁋ”ꋈꄻ。ꎆꒉꎆꇁꑞꅉꀊꂥꃅꁉꃑꌠꄹꇙ,ꎍꐽꏟꈯꃅꏓꂱꀙꎆꃀꇩꏹꈴꌠꄹꎆ,ꏓꂱꀙꎆꃀꃅꋮꐞꃷꎏꀻꎆ。ꋭꋽꃅꃷꂷꏓꂱꀙꎆꃀꎥꃪꀖꁉꌋꆀꌬꈧꌠꄹꎆ。ꐳꃅꎮꉰꇩꏹꎆꒉꎆꇁꈯꄜꋈꄻ。

ꃹꉆꂾꇩꂱꊌꐨꌋꆀꀋꉾꁁꏯꃷꁨꋏꄯꒉꄻꐯꇯꌠꏲꂠꈁꏦꄻꐛꒆ,ꇎꏦꇬꊒꌠꉇꎆꏲꉻꎆꒉꎆꇁꃅꑘꃅꉚꌠꇬꐊꈽꌠꊋꁈꄏ。ꎍꐽꃅꎆꒉꎆꇁꃷꎏꐯꏑꐮꈴꌠꍔꀺ,ꇎꏦꑟꌠꋯꉈꎆꇱꊿꄹꏦꄻꃪ。ꑴꌅꋎꍅꉆꌠꋯꐂꁵꄻꉻꑫꋈꄻꌠꄹꎆ,ꁉꃑꇎꏦꇂꃴꎆꒉꎆꇁꋬꂻꉺꏦꄻꀉꇨ。ꋍꃱꃅꌠꈁꉬꐯꌟꌠꉇꎝꍞꏲꉻꑫꄻꐛ。ꏣꀋꑌꃅꇩꏹꎆꒉꎆꇁꏱꄻꌠꃅꈽ。

（19）ꃄꁕꋮꄮꃅꀻꎆꃄꌬꌠꄐꇐꏤꁈꉺꏦꄻꐛꒆ。ꂱꎆꅑꌠꌌꐯꅋꐮꑣꌠꃄꁕꎆꏣꄐꉻꌋꆀꇩꏤꃄꅉꈥꈉꉻꑫꋈꄻ。ꁮꐚꁁꏯꀉꒉꃅꀖꁉꌠꄹꇙꌊꐛꊂꀊꏀꌠꏓꐛ、ꑛꌋꈤꐊꑷꃅꄖꄑꍄꑐꌠꂵꅐꐨꀊꏀꌠꊌꅜ、ꈯꄔꃅꄷꐳꃅꉀꄓ、ꁭꅐꃅꄷꐳꃅꐛꏀꈴꌠꄹꎆꌠꄹꏦꌋꆀꏱꁈꉻꑫꄻꐛꒆ。ꏢꏸꏹ、ꍤꏦꌕꎏ、ꒀꇤꀎꄊꊅꐎꑠꃅꄷꄹꇙꄉꀊꅰꉾꃪꃅꊇꁧꀊꂥꃅꀻꎆꌠꇙꊋꇁꀦꂿꄐꋊꇤꅐꇁ,ꍤꏦꎆꏣꃄꁕꀻꎆ、ꉸꉼꒊ꒜ꈳꁕꒆꉻꀧꌋꃅꌠꌋꆀꊇꁧꀊꂥꃅꀻꎆꌠꉺꏦꄻꃪ。ꎕꏦꀊꂥꊇꁧꀊꂥꃅꑪꉢꃄꁕꀊꏀꋈꄻꌠꄹꎆ。ꍰꄖꍬꏿꃅꄷꑍꇓꈓꎆꏣꈭꋈꄻꌠꄹꇙꌊꃹꅼꈴꃶꐚꈴ。ꀨꄜꄐꊋꃄꁕꄹꏦꉻꑫꄻꐛꒆ,ꇩꏤꃄꅉꈥꈉꉾꃪꃅꀻꎆꌠꏦꀧꉺꏦꄻꀉꇨ。ꃄꁕꋍꃱꃅꀻꎆꌠꉺꏦꄻꐛꒆ,ꏲꑘꃄꁕꐂꄉꇷꃅꀻꎆꌠꉺꏦꀊꏀꌠꏓꄻ,ꃹꅼꃅꁭꅐꈯꄔꁮꐚꃅꄷꅐꑘꇷꃅ。ꎿꃀꎆꏣꀻꎆꌠꊥꎆꏦꉻꉺꏦꄻꐛꒆ。

ꃘ、ꇓꈓꇓꉈꐮꉔꀻꎆꏦꉻꉺꏦꄻꐛꒆ

ꇓꈓꇓꉈꐮꉔꀻꎆꌠꆹꍏꇩꃤꐛꏀꈴꌠꇖꐨꉫꎂꀕ。ꀋꎪꃅꀊꏀꉹꌠꇮꑘꈴꌠ、ꀊꏀꉹꌠꇓꈓꏦꎫꐛꈴꌠꌋꆀꑣꋂꐊꑷꃅꄖꄑꌄꆣꌠꏓꇲ,ꐊꑷꃅꇓꈓꇓꉈꄐꎖ、ꋈꄻ、ꏱꄻꌠꐮꉔꑟꐨꉀꐕ,ꇓꈓꇓꉈꐊꊈꐽꊯꃅꐮꀠ、ꐮꏯꉜꄉꏭꇙꌠꊥꎆ，ꇓꈓꇓꉈꐮꍣꐨꊨꒊ,ꇓꈓꇓꉈꐯꇯꌄꆣꀻꎆꌠꊥꎆ。

（20）ꀊꏀꉹꌠꇓꈓꏦꎫꐛꈴꌠꄹꎆꏦꉻꉺꏦꄻꐛꒆ。ꅐꑘꊐꐕ、ꊻꂷꏓꋧ、ꇓꈓꏦꎫꀻꎆꌠꉾꃪꃅꐮꇙꌠꉺꏦꏓꄻ。ꅉꀕꃅꀀꋦꅉꑱꁯꁱꄀꄉꅉꀨꋍꏅꁧꃤꃅꌠꇲꁵꌠꄹꏦꄹꌬ，ꇎꏦꇬꄉꄐꌠꂿꑘꆹꏮꊻꂷꐧꋦꄜꏂꀧ、ꀀꑳꏦꀧ、ꇫꐊꇁꌠꌳꃈꅮꋭꑘꂘ꒧ꑠꎞꀀꇀꅉꀀꐴꊻꂷꌋꆀꐯꌟꌠꌅꈌꈲꁧꐥꌠꄹꇙ,ꐳꃅꂿꑘꆹꏮꊻꂷꇓꈓꀀꊿꐛꎻ。ꇓꈓꇬꑱꈿꌠꂿꑘꊿꏦꊒꃄꅉꌅꈌꈲꁧꏦꀧ,ꏦꃤꇬꈴꄉꇓꈓꇬꑱꈿꌠꂿꑘꊿꃄꅉꀧꃅꌅꈌ、ꑲꅉꌫꄻꌅꈌ、ꋍꉻꈲꊌꁷꑣꌅꈌꀧꌋꃅ,ꊨꏦꉌꃹꃅꁌꁵꄉꎞꅐꌠꏡꁈꎹꎥꄻꐛ。

ꏓꂱꇓꈓꏓꂱꋈꄻ、ꏓꂱꇓꈓꏓꂱꎁꃅꌠꌭꈬ。ꇓꈓꄐꎖꉻꑫꄻꐛꒆ,ꇓꈓꀉꒉꐧꀠꀄꊭꌠꌋꆀꇓꈓꏦꎫꀄꊭꌠꋮꄮꃅꀻꎆ、ꏓꋧꏓꌤꌠꄐꉻꄐꏁ。ꃹꅼꃅꇓꈓꋈꄻ、ꀰꏢ、ꏱꄻꏦꉻꄺꀱ,ꐳꃅꇓꈓꀻꎆꄟꆹꏮ。ꀋꇰꀋꉈꀉꒉꌠꇓꈓꀑꁮꇿꋌꀊꂥꃅꏱꄻꉻꑫꀊꏀꌠꏓꐛꌠꄹꇙ,ꇓꈓꈭꇓꈓꐯꌟꃅꀻꎆꌠꏦꉻꉺꏦꄻꐛ。ꃹꅼꃅꊻꂷꌋꆀꎆꏣꄉꈁꇬꄉꄐꌠꎆꏣꐧꋦꏲꂠꌅꈌꄻꀋꇰꀋꉈꌠꍔꁵꌠꄺꀱ。ꐪꊛꉆꌠꇓꈓꏀꆦꈁꏦꌋꆀꏱꁈꏦꇗꄻꐛ,ꊋꀥꇱꄉꅉꃴꏓꇱꁠꐤꈴꈜꋈꄻꌋꆀꁠꐤꑟꀉꆹꌠꄺꀱꊐꐕ,ꃹꅼꃅꇓꈓꋬꂻꇨꊈꑌꐨꉀꐕꃅꐨꃅ。

（21）ꂿꑘꁡꇤꅉꀨꀰꏢꄹꏦꄻꈫꈈꌋꆀꄻꐛꒆ。ꊱꁨꃅꑍꈭꌠꃄꅉꀧꃅꏤꈉꑟꈭꐨꉈꑴꌕꊰꈎꁦꎆꃅꃅꉚꌦꌠꄹꎆ,ꃹꅼꃅꀧꃅꃄꅉꁨꌅꈌ、ꀧꃅꌅꈌ、ꀰꏢꌅꈌꁸꄻꄺꀱ,ꂿꑘꄉꈁꄉꄐꃅꀰꏢꌠꀻꎆ。ꂿꑘꀰꏢꉻꑫꄻꐛꒆ,ꀧꃅꃄꅉꀰꏢꌅꈌꆹꏮꁌꏤꏓꐛꉺꏦꄻꐛꒆ,ꂿꑘꊿꇷꃅꀰꏢꌠꊥꎆ,ꀊꏀꉹꌠꂿꑘꀰꏢꀨꄜꄏꐓꏱꁈꄻꂿꑘꑱꁯꏃꌊꁦꎆꊌꌠꇬꑌꑲꌠꄹꇙ。ꃅꌒꑘꅐꌠꂿꑘꐧꋦꈴꁧꃤꃅꉻꑫꄻꐛꒆ。ꀊꏀꉹꌠꂿꑘꁡꇤꋍꉻꎆꏣꀻꎆ,ꁨꇐꌅꈌꊨꄅ、ꁷꄻꋭꋽꌠꏮꈴꉺꏦꏓꄻ,ꀊꅰꃅꇎꋒꌠꁨꇐꌅꈌꈲꁧꄻꂿ꒧ꊿꁵ。

（22）ꂿꑘꀉꇨꂿꑘꈲꊌꂿꑘꌣꈚꌠꊋꁈꄏꄹꏦꄻꐛꒆ。ꂿꑘꂿꑘꁡꇤꌌꂴꄉꀻꎆꌠꌭꈬ,ꑣꋂꄖꄑꌄꆣꎆꇱꉺꏦꄻꐛꒆ。ꑤꏱꁕꉹꁌꌣꈚꅐꑘꄻꀉꇨ,ꀉꑌꑵꃅꐙꌠꋠꇐꇲꁵꉻꑫꏓꄻ,ꑣꋂꅐꑘꀊꏀꌠꃅꑘꐛꄟꀊꏀꌠꉗꄻ。ꂿꑘꎆꁥꇱꏱꁈꉻꑫꄻꃪ,ꀉꑌꏠꊐꃅꐙꌠꂿꑘꄜꏂꀧꌠꀻꎆ。ꂿꑘꁡꇤꊻꂷꇬꉱꑷꌠꅉꀕꐛꄟꈴꃅꀱꌢꎭꇁꄉꌢꎭꌠꐛꌠꄴꏮꉺꏦꄻꐛꒆ,ꂿꑘꁡꇤꊌꐨꀁꂥꌠꊻꂷꌋꆀꐞꀋꄿꃅꄷꊐꁸꉹꁸꇇꀨꄹꏦꄻꐛ。ꎭꇔꈢꇓꀖꇩꏤꎆꇱꌠꁨꇐꏓꐛꌠꎴꈲꏲꂠꉺꏦꄻꐛꒆ。“ꄙꃪꋉꃆ”ꎖꋪꌫꄻꄉ，ꑣꋂꐊꑷꃅꄖꄑꌄꆣꌠꄹꇙꌠꎴꈲꉺꏦꄻꐛꒆ。

ꐳꃅꋙꊪꂿ꒧ꊿꊌꐨꈲꁧꏦꀧꉺꏦꄻꐛꒆ,ꋚꂷꑠꂿ꒧ꅐꇐꀋꉬꀋꉆꌠꁌꏤꑞꅉꄉꄐꌠꇬꎍꇬꎷꌠꄹꇙ。ꏓꇲꄉꋚꂷꒃꅐꃷꄻꅉꌜꇢꊭꇬꅶꍯꈲꏣꁥꁵꉺꏦꄻꐛ,ꀨꅐꃅꄷꈲꏣꁥꁵꀂꏽꃶꐚꃅꑭꁘꐕꎼꆹ。ꏓꇲꃅꋚꂷꃼꃷꌠꌋꆀꊭꊎꌠꏲꂠꏦꉻꉺꏦꄺꀱꌠꄹꎆ,ꍞꏲꈁꏦꀊꏀꌠꄻꐛ。ꋚꂷꌋꆀꋠꇐꏎꏸꎴꈲꉺꏦꄻꐛꒆ。

（23）ꃹꅼꃅꃄꅉꄹꏦꄺꀱ。ꋠꃅꍆꌬꁥꇱꐮꆽꏣꄹꏦꄺꀱꐛꒆ,꒔ꑞ꒔ꑵꋠꃅꍆꌬꌠꌌꋍꃱꃅꏲꂠꌠꇬꇱꄉ,ꁥꇱꋠꃅꊇꁧꎕꎴꉺꏦꄻꐛꒆ，ꐮꆽꏣꎕꏦꇬꑟꌠꄉꀧ。ꎕꏦꀊꂥꌠꂿ꒧ꋠꃅꋈꄻ、ꍤꎴ、ꏲꂠꀨꎹꉺꏦꄻꐛꒆ。ꋠꃅꌌꅉꀨꂿꑘꋦꁧꊪꏽꌠꏦꀧꌠꏲꂠꉻꑫꄻꐛꒆ。ꂿꑘꑱꁯꏦꊒꃅꁨꐥꌠꀀꑳꌌꊤꁵ、ꇴꃹ、ꇷꃅꑠꇶꏦꇬꈴꄉꋭꋽꃅꌬꈧꉆꎻ。ꊱꁨꃅꂿꑘꁡꇤꋍꉻꀰꏢꉹꌠꋈꄻꌬꃅꃷꎏꃹꄺꀱꌠꄹꎆ,ꃄꅉꁌꎆꊌꐨꈲꁧꁷꑣꉺꏦꄻꐛꒆ。

ꃄꅉꏱꄻꌠꄻꉾꃪ,ꉻꒉꏱꁈꌋꆀꃄꁕꀻꎆꌠꌋꆀꇿꋌꀊꂥꃅꐯꊛꌠꃄꅉꏱꄻꄹꏦꄻꐛꒆ,ꀨꎍꅐꑘ、ꐘꃆꀉꒉꀊꂾꌠꋭꋽꃅꃄꅉꌬꌠꌌꂴꄉꏦꀧ,ꃅꄷꂱꎆꅑꌠꁳꀻꎆꈥꈉꀊꅰꀉꒉꃅꐥꎻ。ꇓꈓꏦꎫꋈꄻꌬꃅꌐꁧꀊꏀꃅꁦꎆꌠꌋꆀꅉꀕꃅꀀꌠꊻꂷꁦꎆꌠꋮꄮꉺꏦꄻꐛ。ꇩꏤꏓꋧꄉꊨꄻꌠꋠꃅꌐꄉꌌꉈꃅꏤꄉꌠꐘꃆꌋꆀꃅꄷꍆꌬꁥꇱꐮꆽꏣꌠꇬꌬꌠꉺꏦꎹꎥ。ꇓꈓꇮꃅꃼꇇꑘꃄꅉꌫꄻꌠꄻꉾꃪ,ꐳꃅꋈꄻꌬꃅꑍꊐꌠꃷꎏꀻꎆ，ꃄꅉꐮꉔꄉꀖꁉꌫꄻ、ꌬꍩꋭꋽꃅꏭꆦꌠꄹꇙ,ꃷꁨꊭꊎꄉꌠꃄꅉꌋꆀꇿꋌꀁꂥꃅꃄꅉꌬꌠꀰꏢꐛꀕ。ꋍꑞꋍꉹꌠꅐꑘꐛꅉꃄꅉꌬꌠꌐꐘꏱꄻꌠꃅ。ꇮꃅꃼꇇꑘꃄꅉꌬꌠꌫꄻꌅꈌꄮꈉꁦꎆꇱꌠꌋꆀꏤꈉꑟꈭꐨꄮꈉꐪꊛꌠꏱꁈꏤꄻ。

ꏃ、ꑞꅉꀊꂥꃅꉇꉻꏭꁉꃑꌠꏦꉻꉺꏦꄻꐛꒆ

ꁉꃑꌠꆹꍏꇩꃤꐛꏀꈴꌠꊨꄅꌠꌐꂷꉬ。ꀋꎪꃅꉇꉻꏭꁉꃑꌠꅉꀨꇩꁈꌭꈬ,ꁉꃑꌠꌌꄺꀱꌠꊥꎆꌠꌭꈬ,ꉪꇩꏤꄉꈁꀉꒉꐯꀉꒉꌠꃷꎏꂱꎆꅑꐨꇬꊫꁱꄉ,ꇩꏹꇷꃅꌠꍔꐯꅉꇬꄉꁉꃑꊋꃤꉀꐕ,ꑞꅉꀊꅰꀊꂥꌠꁉꃑꉹꌠꎆꏣꏦꉻꀊꏀꌠꋈꄻ。

（24）ꎍꐽꃅꄹꏦꉹꌠꁉꃑꌠꍔꒉ。ꑴꇙꃅꇩꏹꎕꏦꀊꂥꌠꎆꏣꃼꇇꏤꏦꊪꊛ, ꁨꇐꌅꈌꀧꌋꃅ、ꅐꑘꀥꇱ、ꋦꈭꎕꏦ、ꑘꃅꀧꌋꃅ、ꍔꃚꃻꄻ、ꄆꌅꃼꇇꑘ、ꎆꒉꎆꇁꁁꏯꑠꏤꏦ、ꄹꏦ、ꏲꂠ、ꎕꏦꐮꈴꐮꐊꌠꃅꇫꑟ,ꂿꉆꎍꐽꂴꉘꇉꉆꌠꄹꏦꋦꈭꄺꂡ。ꑴꌅꃅꁉꃑꌠꍔꒉ,ꊱꁨꃅꉪꇩꏤꃷꇐꃷꎏ、ꁧꃤꃅꃷꎏ、ꎆꀨꃷꎏ、ꑘꃆꃷꎏꑠꉇꉻꏭꁉꃑꌠꍔꒉ,ꇩꏤꐞꀋꄿꐯꐞꀋꄿꈧꌠꏭꄂꃅꁉꃑꌠꍔꒉ。ꃹꅼꃅꉇꉻꇇꀨꏦꉻꉺꏦꄺꀱ,ꈁꉬꐯꅑꄉꏲꂠꌠꃅꇫꑟ。

ꋧꃅꃼꇇꎀꍹꌌꈯꄜꃅꄉꌠꀉꑌꁁꏯꃼꇇꏦꉻꀧꌋꃅ,ꏣꀋꑌꃅꅉꆺꑭꊂꎆꏣꏱꄻꉻꑫꄺꀱꌠꃅꈽ,ꅉꆺꑭꊂꄉꉻꅐꇐꀊꅰꀉꑌꃅꇲꁵ。ꅉꆺꑭꊂꁁꏯꉜꄉꌠꎕꏦꀊꂥꌠꄿꐨꃼꇇꃄꅉꈄꏍꍔꒉ,ꇩꏹꌬꈴꏤꏦꌋꆀꐯꊛꌠꏦꊒꉺꏦꄻꐛ,ꁉꃑꇷꃅꋦꈭꄻꃪ。

（25）ꃹꅼꃅꉇꉻꃼꇇꏦꉻꄺꀱ。ꃼꇇꏱꁈꌋꆀꏱꎆꇗꏸ、ꎆꒉꎆꇁ、ꅐꑘꏱꁈꋮꄮꌠꄻꀉꇨ,ꃼꇇꀉꇨꇩꏤꄹꏦꄘꄏꌋꆀꏱꁈꊋꁈꄏꉻꑫꄺꂡ,ꐳꃅꈏꇓꉇꉻꃼꇇꋍꉻꈴꃅꄺꀱ，ꏣꀋꑌꃅꃼꇇꃷꂷꈴ、ꀊꃴꈴꆸꄟꏭꊜꄻ。ꈴꀸ、ꇗꏸ、ꉇꎆꑠꍞꏲꏀꀺꌠꄹꎆ,ꃅꑘꐛꄟꀊꏀꈁꏦꀊꏀꀻꎆꌠꇬꈲꏣꐥꌠꄹꏦꋦꈭꄺꑣ。ꃷꂷꃼꇇꏀꀺꀻꎆ,ꋯꐂꄆꌅꃼꇇꏓꇱꃅꉚꅉꋈꄻꌠꄹꎆ。ꃷꇐꀉꒉꀊꂾꌠꃼꇇꈯꄜꋈꄻ,ꅉꆺꑭꊂꎞꎭꁷꄻꈯꄜꋈꄻ，ꋍꑞꋍꉹꀨꄜꊱꁨꐥꃅꎿꉈꏮꈴꉁꈾꄐꄻꌠꊋꁈꄏ,ꇎꏦꐥꌠꃅꄷꇩꏹꎊꈬꎞꎭꏍꊨꈯꄜꌋꆀꃷꇐꀉꒉꀊꂾꌠꅐꀦꁆꇱꏍꊨꋈꄻꌠꊋꁈꄏ。ꃼꇇꐔꈔꉆꐨꄴꋏꉺꏦꄻꐛꒆ,ꉇꅐꏲꏢꉻꑫꌋꆀꃼꇇꄏꐓꄹꏦꄻꐛꒆ。

ꁧꃤꃅꃼꇇꏀꀺꉀꐕ,ꐊꑷꃅꋯꐂꁧꃤꃅꃼꇇꀋꉾꁁꏯꃷꁨꋏꄯꒉꌫꄻ,ꁧꃤꃅꑘꍔꒉꏓꇱꃅꉚꅉꌡꀠꄹꎆ,ꌐꑘꁧꃤꃅꏲꉻꊋꊡꄉꇩꏹꈴꁧꃤꃅꄐꊋꉀꐕ。ꐳꃅꋯꉈꃼꇇꀻꎆꌠꄹꎆ,ꀊꏀꉹꌠꋯꉈꇩꏹꃼꇇꃅꑘꀻꎆ。ꋯꐂꎆꒉꎆꇁꁧꃤꃅꉻꑫꋈꄻꐛꒆ,ꎆꒉꎆꇁꅐꇐꌋꆀꁧꃤꃅꇲꁵꌠꄻꀉꑌ。

（26）ꃹꅼꃅꉇꉻꃼꇇꎆꇱꌠꌋꆀꉇꉻꎆꇱꏲꂠꏦꉻꄺꀱ。ꃷꎏꈴ、ꏦꏲꈴ、ꇩꏹꈴꌠꀰꏢꃼꇇꋦꈭꀨꏠꌠꄺꂡ,ꏦꃤꇬꈴꄉꉇꉻꃼꇇꎆꇱꌅꈌꈲꁧꀧꌋꃅ。ꉇꉻꃼꇇꎆꇱꅐꑘꎹꀨꊋꊡꌠꍔꒉ,ꋭꋽꃅꉇꎆꈏꃹꉆꌠꀋꉾꁁꏯꃷꁨꋏꄯꒉꊨꒊ,ꐊꑷꃅꄺꑣꑘꁁꏯꉇꎆꈏꃹꉆꌠꏢꑲꏁꁈꇤꇧꎭꌠꃅꇫꑟ,ꄆꑠ、ꐯꏑꈄꏍ、ꂘꑘ、ꁱꀕ、ꆅꉁꑠꁁꏯꊱꁨꐥꃅꁉꃑꌠꄹꇙ。ꃹꅼꃅꉇꉻꃼꇇꎆꇱꊥꎆꏦꉻꉺꏦꄺꀱ,ꉇꎆꎆꏂ꒧ꆏꐊꊈꇬꄉꊌꅜ、ꇎꏦꄐꐨꈌꁧ、ꎕꏦꏤꄻ、ꍔꃚꃻꄻꑠꁆꏯꇬꇩꂱꈲꏣꏦꀧ,ꅐꑘꊛꏣꐰꉎꁆꇱꇷꃅꌠꇬꊋꁈꄏ。ꋯꉈꀀꊿꋯꈐꀀꇁ、ꆅꉁ、ꎆꁵꑠꐥꐨꈝꐮꄹꏦꄻꐛꒆ。ꉇꉻꏭꎆꇱꏦꉻꉺꏦꊥꎆꌋꆀꏦꀧꌠꄻꐛꒆ,ꉇꉻꏭꎆꇱꏲꂠꁧꃤꃅꉻꑫꄻꐛꒆ,ꅐꑘꊛꏣꇲꁵꊛꏣꇩꏹꇷꃅꌠꄹꇙ。

（27）ꃄꁕꁉꃑꄐꉻꄻꃪ。ꁭꅐꁁꏯꎿꋮꃅꄷꁉꃑꂴꅑꄐꏁꉆꈉꄻꈫꈈ,ꈯꄔꁮꐚꁁꏯꌋꆀꑛꌋꈤꃅꄷꁉꃑꑟꐨꉀꐕ,ꐳꃅꅔꎿꈏꉈꐮꏓꇙ、ꁭꅐꁮꐚꋓꃅꐮꇇꀨꌠꐊꑷꃅꁉꃑꐛꊂꏓꐛ。ꎿꋮ、ꃅꋮ、ꒉꋮꌋꆀꈭꈜꈜꀦꑠꂱꎆꅑꐨꋊꇤ,ꃄꁕꁉꃑꂿꄐꁸꃅꌠꄻꃪ,ꐛꄟꀉꑌꑵꃅꐙꌠꁉꃑꀊꂥꅉꄺꂡ。ꄿꐨꃼꇇꃅꉚꅉꊐꐕꄐꇐꏤꁈꃄꌬ,ꇫꇬꀹꄻꃅꐙꌠ、ꏓꋧꃅꐙꌠꎹꎥꌠꊋꊡ。ꐳꃅꉰꇂꄿꐨꃼꇇꃅꎿꀸꋈꄻ。

“ꋍꇩꑍꏦ”ꄹꏦꂱꎆꅑꐨꋊꇤ,ꑣꇤꇩꏹꎆꒉꎆꇁ、ꎿꄩ、ꃼꇇꈯꄜꑋꅉꉆꈉꄻꈫꈈꉀꐕ,ꑣꇤ、ꀎꂱꊋꁈꄏꄉꇩꏹꌧꊿꀉꇨꌠꏓꋧꀊꂥꅉꄺꂡ, ꑣꇤ、ꀎꂱꇩꏤꉇꉻꏭꁉꃑꌠꇬꀊꅰꉾꃅꂿꄐꋊꇤꌠꉺꏦꄻꐛꒆ。ꒀꇤꀎꄊꊅꐎꇷꃅꌠꄻꃹꅼ, ꏤꏦꐯꊛ、ꉺꏦꐯꊛꌠꄻꀉꇨ。ꎿꋮꑍꄷꎆꏣꁱꀕꐮꈴꇷꃅꊥꎆꄹꏦꌋꆀꏱꁈꄻꐛꒆ,ꎿꋮꑍꄷꐮꐊꄉꀻꎆꌠꄻꃹꅼ。

（28）ꊇꁧꀊꂥꃅꐯꇯ“ꋍꁕꋍꈜ”ꋈꄻꌠꄹꎆꉺꏦꄻꐛꒆ。ꐪꊛꄉ“ꋍꁕꋍꈜ”ꈆꑪꇮꇐꏀꀺꃅꐨꎖꄎꌠꃄꌬ,ꊋꀥꇱꄉꀊꃴꀻꎆ、ꃷꂷꎆꏣꊿꄻꀑꁮ、ꊋꀦ、ꇗꏸꎴ、ꎆꒉꎆꇁ、ꉮꊨꑠꁁꏯꀉꑌꁁꏯꃅꇷꃅꐽꈉꋈꄻ。ꅔꎿꃅꈯꈄꏍꋍꉻꈴꃅꄐꄻꌠꄻꐛꒆ,“ꋍꁕꋍꈜ”ꈁꉬꁁꏯꃅꐯꏑꐮꈴꈄꏍꏓꄻ。ꏓꇲꄉꌐꁧꐨꐥꌠꋉꃆꀉꒉꀊꂾꌠꌋꆀ“ꉻꐭꇈꋽꎔ”ꌠꉹꁌꐥꐨꐘꃆꄹꎆ。

ꉆ、ꈁꉬꈴꎁꃅꏓꂱꋯꁦꌠꄹꏦꉻꑫꄻꐛꒆ

ꈁꉬꈴꎁꃅꏓꂱꋯꁦꀻꎆꌠꆹꍏꇩꃤꐛꏀꈴꌠꊇꅉꇖꐨꉬ。ꀋꎪꃅꀋꇙꀋꑐꃅꍏꇩꐛꐨꐧꋦꉪꏦꍔꍞꀻꎆꈝꃀꍬ,ꉪꇩꏤꁧꀦꍔꍞꄹꏦ、ꅉꀨꍔꍞꄹꏦ、ꍔꍞꄹꏦꀋꂿ꒧ꌠꌭꈬꌋꆀꄻꐛꒆ,ꋍꑞꋍꊐꌠꋯꁦꇶꏦꄻꀉꑌ，ꏓꂱꑱꏲꃥꌋꄻꌠꑭꋧꐨ、ꃶꐚꐨꄛꑣꅷꇩꏤꍔꍞꐥꐨꌋꆀꐧꋦꐥꐨꋍꑞꋍꁆꏯꇬꑟ。

（29）ꊋꀥꇱꄉꏓꂱꑱꏲꃥꌋꄻꌠꄹꏦꋈꄻ。ꏓꂱꁧꎁ꒜ꀉꒉꈿꄹꏦꌭꈬꋒ、ꄻꐛꒆꋒ、ꃄꌬꋒꌶ。ꏓꄊꆹꏲꑘꌤꏲꅉ、ꍞꊟꍤꄻꌤꏲꅉ、ꍤꇽꌤꏲꅉ、ꏦꍤꌤꏲꅉꏭꍞꊟꌠꄹꏦꄻꐛꒆ，ꍞꊟꏦꃤꌋꆀꋍꃄꌬꉺꏦꄻꐛꒆ,ꏓꄊꄐꌗꌗꂫꇽꍤꄻꍞꊟꌋꆀꇩꁨꁨꇐꏲꂠ、ꍔꃚꎝꃆꏲꂠꍞꊟꌠꄻꀉꇨ。ꏓꄊꌤꇖꏤꏦꌋꆀꉉꊪ、ꄤꎖ、ꈋꍣ、ꊪꅲꌠꄹꏦꄻꐛꒆ。ꏓꄊꁧꎁꏓꂱꉹꁌꇬꑌꑲꌠꐊꇐꌋꆀꇶꏦꄻꀉꑌ。ꉹꁌꉪꐨꈺꌬ、ꉹꁌꀑꁮꐨꏓꊭꌠꌤꃅꉺꏦꄻꐛꒆ。ꇪꉼ、ꇭꏾꄨ、ꌋꅪꏓꐊꑠꁥꏓꎀꍹꉹꁌꑌꑲꁧꃤꃅꌠꋒꏡꂿꄐꋊꇤ。

（30）ꋮꒉꋯꁦꉺꏦꄻꐛꒆ。ꏓꂱꍔꑠꌐꁨꋮꒉꏲꉻꃅꄉꌠꂿꄐꋊꇤ,ꃹꅼꃅꋮꒉꐮꇙ、ꉜꐨꋒꐯꋒꃅꉉꄜ、ꀊꐯꈭꃅꉜꐊꐨꏓꋧꌠꉺꏦꄻꐛꒆ,ꊋꀥꇱꄉꏓꂱꍔꑠꐧꋦꐛꐨꉹꁌꉪꐨꉉꄜ、ꉹꁌꑌꑲ、ꏓꂱꁧꃤꃅꉺꏦꋈꄻ。ꏓꂱꍔꑠꋯꁦꍞꊟꉺꏦꄻꐛꒆ。

ꋮꇖꋯꁦꉻꑫꄻꐛꒆ,ꋮꇖꄟꄻꀉꑌꑵꃅꄉ,ꍔꄈꋮꒉ、ꏓꄊꋮꒉ、ꍔꃚꋮꒉ、ꍔꑠꋮꒉ、ꏓꂱꏓꉻꋮꒉ、ꅉꂫꊐꌠꋮꒉꌋꆀꐧꋦꎀꍹꋮꒉꄹꏦꈴꐽꈉꄻꐛꒆ,ꋍꑞꋍꑵꋮꒉꈴꈜꋮꄮꐊꃅꌠꊋꀥꇱ。ꋮꒉꁈꏤꂾꌋꆀꁈꏤꃄꌬꅉꇬꄉꃅꇫꑟꌠꉺꏦꄻꐛꒆ,ꋮꒉꊌꐨꊩꌬ、ꃅꇫꑟ、ꅇꏮꌠꉺꏦꄻꐛꒆ。

（31）ꅉꂫꊐꌠꋯꁦꄹꏦꄻꐛꒆ。ꅉꂫꊐꌠꄈꎀꍹꏲꂠꌠꅉꂫꊐꌠꉹꁌꊨꏦꏲꉺꏦꄻꐛꒆ，ꅉꂫꊐꌠꋯꁦꄹꏦꉻꑫꌋꆀꌤꃅꉻꑫꄻꐛꒆ,ꅉꂫꊐꌠꋍꑞꋍꉹꎀꍹꌋꆀꉹꁌꊱꁨꐥꃅꅉꂫꊐꌠꏱꄻꅉꇬꐊꈽꌠꈴꈜꍔꐯ。ꌤꀞꇬꄇꄜꋊꄹꏦꄻꐛꒆ。ꌤꃅꊿꁧꎁ꒜ꀉꒉꈿꌠꌌꅉꀨꇶꏦꃅꄉꌠꎆꏂꑘꌤꑘꌤꃅꅉꋯꁦꏲꂠꄹꏦꄻꐛꒆ,ꎆꏂꑘꌤꃅꊿꏲꂠꌠꇬꐊꈽꌠꇿꋌꇶꏦꄻꐛꒆ。

（32）ꀉꒉꃅꏓꋍꃱꃅꁁꏯꌤꃅꐛꊂꄻꐛꒆ。ꊋꏓꋍꃱꃅꁁꏯꃰꊿꉌꏓꋍꏢꃅ、ꊋꃤꏓꋧꌠꍔꍞꂿꄐꋊꇤꌠꏱꁈꏁꁈꄻꐛꒆ。ꍏꇩꀊꏀꉹꌠꍔꄈꄹꏦꌭꈬꋒ、ꀻꎆꋒ、ꄻꐛꒆꋒꃅꄉ。ꀊꅰꉾꃪꃅꄈꉈꊿꂒꋦꌠꂿꄐꋊꇤ,ꄈꉈꁧꎁꊿꂒꋦꁥꌠꂘꄻꄹꏦꄻꐛꒆ。ꊿꋅꋯꑌꀻꎆꊥꎆꏦꃤꏤꄻ,ꍏꉸꊿꋅꏓꐊꄜꉪꉻꄻꈫꈈꄹꏦꉺꏦꄻꐛꒆ,ꍏꉸꊿꋅꏓꋧꊋꃤꀉꇨꇱ。ꉻꑫꃅꉪꇩꏤꊝꏫꍏꇩꃅꐙꌠꄹꎆ,ꊝꏫꌤꃆꏱꄻꏦꏲꈴꌠꊋꀥꇱ。ꄈꉈꌧꇐꐥꊿꌋꆀꀊꏀꌠꐧꋦꏠꊐꊿꂒꋦꌠꍔꍞꄐꏁꉺꏦꄻꐛꒆ。ꐊꑷꃅꉁꅉꐙꎴꌠꏲꑘꃼꇇꐮꃆꂮꏓꄻ,ꉻꁨꏦꀋꉬꌠꎆꏣꁣꀋꐥꃅꀻꎆ、ꉻꁨꏦꀋꉬꌠꎆꏣꊿꂒꋦꌠꉾꃪꃅꉀꒆꌠꊥꎆꌤꃅꉺꏦꄻꐛꒆ。ꇤꀎꄠꌋꆀꇩꉈꃺꑌꌤꃆꌤꃅꉺꏦꄻꐛꒆ。

ꈬ、ꍏꇩꐛꐨꐧꋦꉪꏦꏦꏲꉻꑫꄻꐛꒆ

ꏦꏲꌠꆹꍏꇩꃤꐛꏀꈴꌠꇬꏦꀧꅍꀋꂿꑘꌠꉬ。ꀋꎪꃅꐊꑷꃅꏦꃀꃄꌬꑞꅉꑟ,ꏦꃀꋦꒉꐨꀧꌋꃅ，ꐮꐊꄉꏦꃤꏤꄻ、ꏦꌬ、ꌦꃔ、ꏦꍬꌠꋍꑞꋍꑵꈭꊭꄺꀱꌠꄹꎆ,ꏦꃤꂴꆽꊿꃅꐥꊯꌐꑠꏦꀧꉺꏦꄻꐛꒆ，ꐧꋦꉪꏦꏦꏲꉌꊈꍔꆙ,ꐧꋦꀋꈐꀋꉈꑗꉬꌠꀧꌋꃅ,ꐊꑷꃅꇩꏤꋍꑞꋍꁁꏯꌤꃅꏦꏲꈴꌠꄹꎆ。

（33）ꃹꅼꃅꏦꃤꏤꄻꁁꏯꄺꀱ。ꏦꃀꌌꈯꄜꃅꄉꌠꍏꇩꐛꐨꐧꋦꉪꏦꏦꃤꉻꑫꄻꐛꒆ，ꏦꃀꐊꑷꃅꃄꌬꌠꄉꀧꌠꄹꏦꉻꑫꄻꐛꒆ,ꏦꃀꃄꌬꐛꐨꅇꄜꄹꏦꄻꐛ。ꄈꊈꏲꂠ、ꏓꄊꄐꇺ、ꍔꃚꊫꁱ、ꋍꑞꋍꁆꏯꇫꐊꈽꌠꏦꃤꏤꄻꌤꃅꐛꊂꄻꐛꒆ。ꏓꇲꄉꏤꄻꄺꀱꀜꋊꉉꀽꁰꄻ,ꀋꉬꀋꉆꁁꏯ、ꏀꄓꁁꏯ、ꉇꉻꃆꂮꁁꏯꏦꃤꏤꄻꌠꊋꀥꇱ,ꏦꃀꇬꄐꊒꐨꍤꄻ、ꅺꇰꁱꄀꍤꄻꄹꏦꄻꐛꒆ，ꏦꃤꏤꄻꊇꁧꉀꐕ。ꃄꁕꋯꐊꏦꃤꏤꄻꌠꎹꎥ。ꄈꈒꇓꏦꇗꌋꆀꇩꏤꏦꃤꏦꇗꐯꊛꋮꄮꉺꏦꄻꐛꒆ。ꇩꏤꑭꊂꋍꃱꃅꐙꌠꏦꃤꏦꇗꌋꆀꋊꍬꐨꐥꌠꁱꐘꈴꌗꐽꈉꋈꄻ。

（34）ꃹꅼꃅꏦꃤꇬꈴꄉꏲꑘꏲꌠꄹꎆ。ꍔꃚꏲꉻ、ꌅꊋ、ꌅꈐ、ꈭꎁ、ꆽꎍꐨꏦꏤꈴꌠꄹꎆ,ꍔꃆꁧꃤꃅꌠꎕꏦꈴ、ꐛꏦꈴ、ꈝꐮꈴꌠꊥꎆ,ꇩꏤꑭꊂꃅꉱꑷꈴꌠꋍꃱꃅꈄꏍꇬꄉꏲꃆꁧꃤꃅꐽꈉꄻꐛꒆ。ꀉꒉꀊꂾꃅꁈꏤ、ꋊꍬꐨꐥꌠꁱꐘꏦꊒꐨꍤꄻꉺꏦꄻꐛꒆ。ꍔꃚꏦꃤꏤꄻꍤꄻꌠꊋꀥꇱ。ꃹꅼꃅꏲꑘꏦꌬꏦꉻꄺꀱ,ꅉꂫꊐꌠꏓꇱꏦꌬꏦꉻꉺꏦꄻꐛꒆ,ꏲꑘꏦꌬꍞꊟꏦꉻꉺꏦꄻꐛꒆ。ꏲꑘꅓꀞꑠꁁꏯꏲꑘꎕꇽꌅꈌꅉꀨꎕꏦꄹꏦꄻꐛꒆ,ꏲꑘꏦꌬꎕꏦꃄꁕꐂꐯꊛꌠꄹꇙ。ꏲꑘꅓꀞꌠꌋꆀꅓꑘꅓꀞꌠꑍꁁꏯꐮꊪꊛꌠꄹꏦꄻꐛꒆ。ꏲꑘꇕꀱꏦꉻꉺꏦꄻꐛꒆ。ꏲꑘꏤꇽꄹꏦꄻꐛꒆ。ꊒꀕꃅꏲꂠꏦꉻꌋꆀꃅꄷꊐꁸꄉꏲꂠꌠꏦꉻꄻꐛꒆ,ꊒꀕꃅꏲꂠꏲꉻꌋꆀꃅꄷꇷꃅꐊꃅꌠꉺꏦꄻꐛꒆ。ꋭꋽꃅꊻꂷꀁꑌꑤꏲꉻꄻꃪꌠꄹꎆ。ꃹꅼꃅꀖꁉꅉꏲꂠꌠꄹꏦꄺꀱ。ꌤꑘꌤꃅꅉꐛꉻꄐꉻꄻꃪ,ꉻꈲꐨꄻꀉꇨ。

（35）ꀋꈐꀋꉈꃅꏦꌬꌦꃔꏦꉻꉺꏦꄻꐛꒆ。ꍞꊟꍤꄻꌤꏲꅉ、ꇬꉢꌤꏲꅉ、ꏦꍤꌤꏲꅉ、ꍤꇽꌤꏲꅉ、ꌦꃔꏲꑘꌤꏲꅉꈁꐥꌠꂱꑱꃅꎁꃅ,ꍞꊟꍤꄻꌅꈌ、ꍤꌋꌅꈌ、ꏦꍤꌅꈌ、ꍤꇽꌅꈌ、ꃄꌬꌅꈌꐮꐊꃅ、ꐮꇬꏢꑲꌠꏦꉻꉺꏦꄻꐛꒆ,ꏦꌬꌦꃔꈭꊭꈁꐥꌠꈁꉬꈴꎁꃅꇿꋌꐥꃅꍞꊟꌠꇬꄉꌬꌠꏦꀧ。ꃹꅼꃅꍤꇽꌅꈌꌋꆀꃄꌬꌅꈌꁷꐞꌠꄺꀱ,ꇩꏤꃄꌬꏦꉻꄻꐛꒆ,ꌢꆈ、ꏦꍤꌤꏲꅉꌋꆀꐧꋦꋍꏅꏭꃄꌬꃅꈧꌠꈁꉬꈴꎁꃅꍞꊟꌠꄻꀉꇨ。ꏦꌬꌦꃔꇇꀨꀧꌋꃅꄹꏦꄻꐛꒆ,ꇩꏤꀵꊒꄹꏦꄻꐛꒆ。ꌦꃔꄇꄜꋊꌠꃹꅼꈴꌋꆀꋊꍬ,ꌦꃔꆽꎍꄹꏦꃅꇫꑟꌋꆀꄻꐛꒆ。ꌐꁨꃔꑼꄐꄻꎕꏦꈴ。ꃹꅼꃅꏲꑘꃣꈌꏠꊐꏱꄻ、ꏓꋧꄉꏱꄻ、ꌞꃅꄷꄉꏱꄻꌠꄺꀱ。ꋯꐊꇿꋌꀊꂥꌠꏢꍤꂿꃆꏦꉻꉺꏦꏓꄻ，ꃅꄷꇬꉢꌤꏲꅉꏲꉻꌤꃅꊿꃷꁨꏲꂠꄺꀱꌠꄹꎆ,ꐪꊛꄉꂱꉴꇬꉢꌤꏲꅉꌋꆀꈴꀸꂁꎞꂁꎭꌠꍤꒃꌤꏲꅉꏲꂠꏦꉻꄺꀱꌠꄹꎆ。ꏢꍤꌤꃆꇇꀨꊿꏲꂠꄹꏦꋊꍬ。

ꏟꈯꃅꊿꌅꈌꉜꐨꎃꊒꌠꌭꈬ,ꊋꀥꇱꄉꊿꌅꈌꏦꌬꌦꃔꏦꀧ,ꌤꅐꂾꍤꄻ、ꌤꅐꅉꇬꍞꊟ、ꌤꅐꊂꄺꀱꑠꌤꃅꉺꏦꄻꐛꒆ,ꉻꊿꇭꀧꌅꈌꈲꁧꇬꃆꂮꐥꌠꄀꇗꇱꏁꁈꉈꑴꍤꈢ、ꑸꄉ、ꄯꏢꑠꄀꇗꇱꏁꁈꄻꐛꒆ,ꏦꃤꇬꈴꄉꄉꅍꌅꈌꌌꈲꏂꏦꐆ、ꏦꀋꈴꃅꈢꏢ、ꅥꇷꄉꅇꅲꑠꑽꃤꐆꃅꐨꍤꀞ。ꅓꑘꃣꈌꑗꅒꊿꅔꀥꌠꈁꉬꃅꉱꑷꌠꄹꎆ。ꊼꇅꀊꐎꃅꑽꃤꐆꌠꎺꁱꋍꎤꄉꌠꄹꏦꄻꄉ。

（36）ꏦꏲꐧꋦꋈꄻꌠꄹꎆꉺꏦꄻꐛꒆ。ꇓꈓꇓꉈꃅꉱꑷꌠꄉꉻꏦꃤꁧꃤꃅꉻꑫꄻꐛꒆ,ꃹꅼꃅꑗꅒꊿꄹꏦ、ꉻꊪꏦꉻ、ꇢꆣꇽꄹꏦ、ꉉꀞꄹꏦ、ꌦꃔꍜꇠꏲꂠꏦꉻꄺꀱ。ꏦꏲꄜꉺꉙꂘꌠꄻꃪ,ꃄꄻꌠꌌꍝꄎꌠꏦꃤꌶꅉꉙꂘꉘꉚꉺꏦꄻꐛꒆ。ꊿꒆꆹꀋꑟꌦꌠꌅꈌꈲꁧꀧꌋꃅꌠꊋꀥꇱꌋꆀꄻꃪ,ꊿꒆꆹꀋꑟꌦꌠꑽꃤꐆꌠꄴꏮꌋꆀꏱꄻꌠꄻꀉꇨ,ꌐꄉꍬꄻꉙꂘꌠꏤꐪꏤꄻ。

（37）ꊋꀥꇱꄉꉇꉻꃆꂮꐥꌠꏦꏲꋈꄻ。ꋍꃱꃅꉇꉻꃆꂮꐥꌠꏦꃤꏤꄻ、ꏦꌬ、ꌦꃔ、ꏦꍬꌋꆀꏦꃤꁧꃤꃅ、ꏦꏲꌧꊿꉗꄻꌠꌤꃅꉺꏦꄻꐛ。ꉇꉻꃆꂮꐥꌠꏦꃤꏦꇗꉻꑫꌋꆀꏦꏲꃄꌬꉻꑫꄻꐛꒆ,ꃹꅼꃅꏦꌬꌦꃔꇩꏹꇷꃅ。ꉇꉻꃆꂮꐥꌠꉹꁌꃆꑘꏦꃤꐮꃆꂮꇬꌢꆈꆏꏦꃤꇬꈴꄉꏤꄉꏱꄻ、ꃄꁕꉈꏦꃤꌬꉆꌠꌊꄻꑠꌦꃔꍤꇽꄹꏦꄻꐛꒆ。ꇩꏹꃼꇇꌤꃆꇢꆣꇽꌠꌋꆀꉉꀞꄹꏦꄻꐛꒆ,ꇩꏹꀨꏠꌠꇢꆣꇽꏲꉻ、ꑗꅒꊿꌤꀞꅉꉘꉚ。ꏣꀋꑌꃅꇩꏹꏥꏦꏤꄻꈽ。

ꊰ、ꃹꅼꃅꁱꀕꏦꉻꉺꏦꄺꀱ

ꍏꇩꃤꐛꏀꈴꌠꆹꐥꇐꌧꑳꌋꆀꉌꊈꌧꑳꐮꄮꌠꐛꏀꈴꌠꉬ。ꀋꎪꃅꁱꀕꑴꑇꌠꀉꇨꇁꎻ,ꐧꋦꉪꏦꂴꅑꁱꀕꀻꎆ,ꇝꂱꁱꀕꍔꆙ,ꍏꉸꋊꃅꁱꀕꄞꅐꌠꊪꊛ,ꐳꃅꈴꌗꇮꇐꐳꐯꐳꃅꀻꎆꌠꃅꒊꃅꇁꀊꏀꌠꇬꄉꄐ,ꁱꀕꄞꅐꌠꌧꊿꄉꈁꀉꒉꌠꉘꉚꐛꄉ,ꊿꋅꑭꊂꁱꀕꏀꀺꀹꄻꌠꍄꑐꊋꃤꄖꄑꎼꇁ。

（38）ꉪꐪꐛꉻꌤꃅꆼꎍꄹꏦꄻꐛꒆ。ꄈꅿꏀꀺꌧꇗꌌꄈꑭꊂꉌꊐ、ꏓꂱꉙꂘ、ꃄꄻꄐꇺꌠꌤꃅꉻꑫꄻꐛꒆ，ꄈꊈ（ꄈꊤ）ꌧꇗꌶꄻꈯꄜꊤꌶꄻꄹꏦꄻꐛꒆ,ꉪꇐꍔꍞꌤꃅꉻꑫꄻꐛꒆ。ꂷꇻꌦꉪꏦꌧꇗꎥꃪꌠꌋꆀꋈꄻꌠꋉꃆꏀꀺ,ꍔꑪꐧꋦꈆꑪꏀꀺꋉꃆꃄꄻ,ꍏꇩꍔꑪꐧꋦꈆꑪꑴꌅꌧꇐꉻꑫꏓꄻ。ꈨꏀꅇꉉꊿꄹꏦꄻꐛꒆ。ꈁꉬꇢꈴꄜꒃꅐꄜꁊꌠꇬꄉꄐꌠꌤꃅꉺꏦꌋꆀꉉꍣꉻꑫꏓꄻ,ꈯꀨꇢꈴꄜꉻꑫꃅꄺꀱꌠꄹꎆ。ꈋꍣꄐꇺꉺꏦꌋꆀꈋꍣꐛꐨꊜꄻꋯꐊꉺꏦꄻꐛꒆ。

ꉪꅉꑇꐨ꒿ꂘꌠꅉꀕꐛꄟꈴꄹꏦꈴꌠꄹꇙ。ꐧꋦꉪꏦꈯꄜꁌꐨꉜꐨꄹꏦꉗꄻꌋꆀꃄꄻꌠꉺꏦꄻꐛꒆ。ꌧꑳꉘꉚ、ꌧꑳꃄꄻ、ꌧꑳꀹꄻꌤꌠꃅꉺꏦꄻꃪꏀꀺ。ꌧꑳꃅꀹꋈꄻꋉꃆꃄꄻ。ꌻꇭꌺꄿꌶꀠꊿꄜꉺꌶꄻꉺꏦꄻꃪ,ꇩꉂꉪꏦ꒿ꂘꌠꌋꆀꋍꑞꋍꉹꉹꁌꐨꐥꌠꅇꀨꃄꄻꌠꊥꇫꉺꏦꏀꀺ,ꐧꋦꑭꊂꃅꌳꈄꁌꒉ、ꇏꃅꀎꋏꉪꎺ、ꂴꅑꌶꀠꃄꄻꌠꄹꇙ。ꍏꉸꋊꃅꑌꇐꉾꃪꌠꊪꊛꉻꑫꏓꄻ,ꐧꋦꄉꉻꑌꇐ、ꃅꑘꑌꇐ、ꑱꈐꑌꇐ、ꑴꅉꑌꇐꋈꄻꏦꉻꉺꏦꄻꐛꒆ,ꉌꒊꋈꄻꎴꈲꉺꏦꄻꐛꒆ，ꐧꋦꑭꊂꉙꂘꄐꇺꄉꉉꄻꀋꅐꃅꏦꃤꍬ、ꃅꀹꐥꀹꂄꌠꇬꍬ,ꏟꈯꀕꃅꎆꇢꉪꏦ、ꈩꌒꉪꏦ、ꎖꃨꅑꇨꌠꊨꏦꉪꏦꌋꆀꐩꋊꀈꈥꉪꏦꏭꁏ。ꈄꏍꇬꄉꉪꇐꑌꇐꉙꂘꌠꉹꁌꁸꐨꐥꃅ、ꊒꌸꐨꐥꃅꃄꌬꌠꉺꏦꏓꐛ。ꑌꇐꁁꏯꌤꃆꑓꅐꎑꌠꋯꐊꏱꄻꉺꏦꄻꐛꒆ,“ꎲꌩꄸꅥ”ꌠꎴꈲꉺꏦꄻꐛꒆ。

（39）ꁱꀕꁧꃤꃅꌠꌋꆀꁱꀕꅐꇐꇲꁵꉺꏦꄻꉾꃪ。ꄉꉻꁱꀕꁧꃤꃅꉻꑫꄻꐛꒆ,ꊈꂄꁱꀕꅐꀦꈛꎂꃅꅉꂫꊐꌠꇬꑟꌠꉺꏦꋈꄻ,ꐧꋦꊋꃤꄉꉻꁱꀕꁧꃤꃅꈽꌠꉺꏦꄻꐛꒆ,ꄉꉻꁱꀕꉁꈾꁨꌅꈌꌋꆀꌫꄻꌅꈌꁷꄻꄺꀱꌠꄹꎆ。ꃹꅼꃅꁱꀕꁁꏯꇩꏤꎆꀨꇩꁨꎆꏂꑘꄺꀱ,ꉹꁸꄉꁱꀕꌤꑘꌤꃅꅉꃹꅼꃅꈏꇓꄺꀱꌠꄹꎆ,ꁱꀕꋽꇐꑼꄨꋈꄻꀻꎆꉺꏦꄻꐛꒆ。

ꏓꂱꌌꈯꄜꃅꄉꌠꁰꄻꍝꄎꌠꌭꈬ,ꊌꐨꃅꅐꇁꌠꌋꆀꌧꊿꅐꇁꌠꄻꐯꇯ、ꁱꇐꒃꉇꌠꌋꆀꋦꈭꒃꉇꌠꐮꐊꐙꌠꌭꈬ,ꁱꀕꋽꇐꁰꄻꒃꅐꁧꃤꃅ、ꄐꏁ、ꊥꇬꌠꌤꃅꉺꏦꄻꃪ。ꁱꀕꅐꑘꉻꑫꌋꆀꃷꎏꉻꑫꄻꐛꒆ,ꁱꀕꎆꏣꏱꁈꄻꐛꒆ。ꁱꀕꌋꆀꈆꑪꇮꇐꐮꉔꌠꇿꋌꐥꌠꉺꏦꎹꎥ,ꐳꃅꀊꏀꉹꌠꁱꀕꃅꑘꐛꄟꀻꎆ。ꃹꅼꃅꁱꀕꁁꏯꏲꑘꍤꄻꈌꁧꅺꇰꄹꏦꄺꀱ,ꊋꀥꇱꄉꌤꇬꌤꊂꍞꏲ。ꃹꅼꃅꁱꀕꈩꇐꁁꏯꏓꇱꏱꄻ。

ꁱꀕꍸꇐꀧꌋꃅꊪꊛꌤꃅꋮꄮꏲꉻꄻꐛ,ꁱꀕꍸꇐꀧꌋꃅꍞꊟꍤꌋꄹꏦꄻꐛ,ꁱꀕꍸꇐꉻꑫꃅꀧꌋꃅꌋꆀꏓꋍꃱꃅꍞꏲꌠꄹꇙ。ꍏꉸꌧꑳꌐꄀꉻꑫꏓꄻ。ꁱꀕꌋꆀꈩꆫꌠꃹꅼꃅꐮꉔꄉꀻꎆꌠꏦꉻꉺꏦꄻꐛꒆ。ꉹꁌꃅꇭꀧꈯꎟꌠꄉꉻꁧꃤꃅꉻꑫꄻꐛꒆ,ꋓꈿꈯꎟꏲꂠꏦꉻꌋꆀꏮꈴꉺꏦꄺꀱꐛꒆ。

（40）ꈄꏍꏓꇱꏱꄻꉻꑫꄻꐛꒆ。ꃹꅼꃅꈄꏍꏲꂠꏦꉻꄺꀱ,ꈄꏍꐊꇐꋈꄻꌋꆀꏲꂠꌅꊋꋊꍬꐯꇯꀱ,ꈨꏀꄜꉺꌠꌋꆀꈄꏍꈋꍣꌠꋍꃱꃅꏲꂠꌠꄹꎆ。ꒆꐛꃅꐙꌠꊿꄻꀑꁮꄐꊋꀻꎆꌠꌋꆀꏲꂠꉺꏦꄻꐛꒆ。ꊋꀥꇱꄉꈄꏍꈥꈉꏦꏲꋈꄻ,ꈄꏍꒆꉻꏱꄻꎴꈲꉺꏦꄻꐛꒆ,ꊿꒆꆹꀋꑟꌦꌠꈄꏍꀧꌋꃅꌠꌤꃅꉻꑫꄻꐛꒆ。

（41）ꀊꅰꃅꇿꋌꐥꌠꇩꏹꄜꁊꉻꑫꏓꄻ。ꇩꏹꄜꁊꐛꉻꄺꀱꌠꄹꎆ,ꃹꅼꃅꈯꀨꇢꈴꄜꇩꏹꄜꁊꉺꏦꄺꀱꏀꀺ,ꐳꃅꈴꈜꀉꑌꏢ、ꆺꄜꃅꐙꌠꉇꉻꏭꄜꁊꌠꐛꉻꏓꄻ。ꐳꃅꍏꇩꅇꉉꌋꆀꍏꇩꌤꉉꉻꑫꏓꄻ,ꐊꑷꃅꇩꏹꄜꁊꌠꇿꋌꉀꐕ。ꅉꆺꑭꊂꌧꑳꄕꊪꃄꄻꉺꏦꋈꄻ。ꉇꅐꁧ、ꁨꌊꈏꃹꇁꌠꏲꂠꈝꐮꈴꌠꄹꇙ,ꇩꏹꃰꊿꁱꀕꐮꈴꇷꃅꌠꍔꐯ。

ꊯꊪ、ꉹꁌꐥꐨꏦꀧꌋꆀꄻꃪꌠꄹꏦꉻꑫꄻꐛꒆ

ꀻꎆꌠꇬꄉꉹꁌꐥꐨꏦꀧꌋꆀꄻꃪꌠꆹꍏꇩꃤꐛꏀꈴꌠꂿꃆꀉꒉꀊꂾꌠꉬ。ꀋꎪꃅꊋꈀꑌꃅꇤꄉꃅ、ꊋꎖꄉꃤꀳꌠꌭꈬꌶ，ꅉꀨꄉꉻꁧꃤꃅꌠꄹꏦꉻꑫꄻꐛꒆ,ꊋꀥꇱꄉꁊꈲꃅꐙꌠ、ꅉꃀꃅꐙꌠ、ꉱꑟꃅꐙꌠꉹꁌꐥꐨꋈꄻ，ꏓꂱꇫꉈꇬꐯꉈꇬꈛꎂꐯꈛꎂꃶꐚꐯꃶꐚꌠꈲꁧꌤꃆꂥꀘꋒ,ꀋꆏꃅꏓꂱꐥꐨꐥꌒꉌꑌꌠꇬꇎꈴꎻ。

（42）ꊌꐨꁷꄻꄹꏦꄻꐛꒆ。ꉘꃀꃢꌠꁷꄻ、ꉈꑴꋍꃢꁷꄻ、ꌕꃢꌠꁷꄻꌠꋮꄮꋬꈭꄹꏦꉻꑫꏓꄻ,ꀀꊿꊌꐨꇩꂱꊌꐨꁷꄻꅉꇬꍆꐪꉀꐕ,ꑘꃅꃄꎆꇬꂾꃢꌠꁷꄻꅉꇬꍆꐪꉀꐕ。ꑘꃅꊿꃄꎆꏤꄻ、ꋭꋽꃅꉀꎆ、ꁵꄻꏦꀧꉺꏦꄻꐛꒆ,ꐊꊈꇬꈴꄉꁷꄻꌠꏱꁈꄹꏦꄻꐛꒆ。ꇗꏸꎴ、ꐧꋦꏦꀧ、ꆹꏮꁵꄻꑠꉈꑴꁷꄻꌠꋊꐽꉺꏦꄻꐛꒆ。ꉻꈲꂄꃅꌤꑘꀻꎆꌠꊋꁈꄏ。

ꊌꐨꁷꄻꐥꀹꋊꍬ,ꁨꇐꏓꊭꉺꏦꋊꍬ，ꈴꈜꀉꑌꈚꃅꈴꄉꇓꈓꇓꉈꀀꊿꁨꇐꃅꐙꌠꊌꐨꁦꎆꇱ,ꇿꋌꐥꃅꊿꊌꐨꀁꂥꁥꌠꊌꐨꁦꎆ、ꎍꐽꃅꊌꐨꐧꀠꊐꌠꊿꁥꌠꄉꈁꍔꒉ、ꋭꋽꃅꊌꐨꀊꂥꇨꌠꋊꐽꌠꄹꏦꉻꑫꄻꐛ。ꃹꅼꃅꇩꁨꎆꏂꑘꃄꎆꏤꄻꉺꏦꄺꀱ,ꋭꋽꃅꇩꁨꎆꏂꑘꈁꐥꊐꌠꏲꌋꃄꎆ、ꁥꇱꎆꀥꁵꎆꑠꏤꄻꄷꀋꁧꏦꇨꃅꋊꍬ。

（43）ꃅꑘꊌꌠꄻꂴꄉꌠꏱꁈꄻꐛꒆ。ꊇꁧꀊꂥꃅꋒꐯꋒꃅꃅꑘꊌꌠꊥꎆꉺꏦꄻꐛꒆ,ꃅꑘꊌꌠꄉꉻꁧꃤꃅꉻꑫꄻꐛꒆ,ꊋꇤꄉꐛꉻꃅꐙꌠꃅꑘꊌꐮꄙꐨꂥꀘ。ꌶꅉꀊꂥꊐꌠꌶꅐꌠꌶꌺ、ꂿꑘꊿꊋꃅꌠ、ꎞꆏꂽꑼꑠꀋꉬꀋꉆꁥꌠꃅꑘꊌꌠꊋꁈꄏꉻꑫꄻꐛꒆ，ꐥꍂꃅꃅꑘꇮꇐꄐꊋꁱꂘꄹꏦꄻꐛꒆ。ꇓꈓꇓꉈꃅꑘꊌꏱꁈꉻꑫꏓꇲ,ꋍꋓꃅꑱꁯꊫꌐ、ꊾꌬ、ꄉꉣꑠꁧꃤꃅꄺꀱꌠꄹꎆ,ꑘꀺꌠꃅꑘꊌꌠꊥꎆꌠꏱꁈꋦꈭꄻꃪ，ꃅꑘꊌꐛꐨꀊꏀꌠꀻꎆꌠꊋꁈꄏꌋꆀꋊꍬ。ꊜꋽꄮꉻꐽꌠꊥꎆꌠꄹꏦꉺꏦꄻꐛꒆꄉ,ꐧꋦꏭꇙꈴꈜꁣꀋꐥꎻ。ꑘꃅꐮꃆꂮꋮꒉꋮꄮꉺꏦꄻꐛꒆ,ꊋꀥꇱꄉꑘꃅꊿꌅꈌꈲꁧꏦꀧ。

（44）ꐧꋦꏦꀧꉻꑫꄻꐛꒆ。ꅉꀨꃀꌠꀨꎹꄜꏂꀧꇩꏤꑭꊂꏓꇲꄹꏦꄻꐛꒆ,ꇩꏤꑭꊂꋍꃱꃅꐙꌠꐧꋦꏦꀧꄉꉻꁧꃤꃅꐽꈉꄻꐛꒆ。ꐧꋦꄜꏂꀧꎆꀨꁌꀧꁌꎆꌠꌋꆀꋬꂻꍞꏲꉻꑫꄻꐛꒆ。ꅉꀨꃀꌠꀨꎹ、ꅉꀨꆅꉁꄜꏂꀧꎆꏓꌠꌋꆀꊌꐨꋭꋽꃅꋊꄻꌠꉺꏦꄻꐛꒆ,ꋍꁘꋍꁘꃅꇓꈓꇓꉈꀀꊿꅉꀨꃀꌠꀨꎹꄜꏂꀧꅉꃀꃀꌠꀨꎹꎆꉀꐕ。ꋭꋽꃅꃅꑘꊌꌠꊿ、ꂿꑘꊿꊋꃅꌠ、ꃅꑘꊌꐛꐨꀊꏀꌠꊿꐧꋦꏦꀧꄹꏦꄻꐛꒆ,ꃅꑘꀋꊌ、ꇮꃅꂷꊂꌸ、ꒆꉘꄜꏂꀧꌠꉱꑷꐨꍔꐯ,ꐊꑷꃅꃅꑘꊌꅉꇬꄉꄜꏂꀧꐊꈽꌠꑱꁯꊫꌐꏢꑲꄉꌠꇤꇧꎭ，ꐧꋦꏦꀧꃆꂮꆹꏮꊪꊛꏱꁈꄻꐛꒆ。ꐳꃅꀉꑌꊐꃅꐙꌠꈯꌬꀉꑌꑵꃅꐙꌠꃀꌠꀨꎹꄜꏂꀧꉻꑫꀻꎆ，ꃅꈎꃄꎆꄹꏦꉱꑷꈍꈐꍔꐯ,ꑱꄜꃀꌠꀨꎹꎆꄹꏦꄹꌬ。ꋍꑞꋍꉹꃼꇇꑘꄜꏂꀧꀥꇱꏦꀧꂿꄐꋊꇤ。ꅉꀨꆅꉁꄜꏂꀧꌜꊐꌠꏓꇲꌠꄹꎆ,ꃹꅼꃅꆅꉁꄜꏂꀧꎆꁵꄟꄺꀱ，ꆄꒉꈺꒉꄜꏂꀧꌋꆀꆅꉁꆄꄻꈭꋏꇇꀨꄹꏦꄻꐛꒆ,ꊋꀥꇱꄉꆅꉁꆄꄻꄜꏂꀧꎆꀨꍞꏲ。ꐧꋦꈭꋏꇇꀨꉻꑫꄻꐛꒆ。ꌋꅪꀊꉘꏦꊒꌅꈌꈲꁧꏦꀧꄹꏦꄻꐛꒆ。ꊾꄣꐧꋦꏦꀧꄹꏦꌋꆀꉈꇬꁧꃤꃅꉻꑫꄻꐛꒆ。

ꐳꃅꊤꃼꐯꇯꃅꌠꀀꑳꄹꏦꋈꄻ,ꐳꃅꑲꅉꇤꂷꅐꑘꀻꎆꈁꏦꀊꏀꌠꏓꄻ。ꏦꀧꐨꐥꌠꀀꑳꋈꄻꌠꌋꆀꇲꁵꌠꍔꒉ,ꃄꎆꊌꁥꌠꀀꑳꈉꇨꌠꇬꇎꈴ。ꇓꈓꇓꉈꀀꊿꀉꑌꑵꃅꄻꃪꐨꐥꌠꀀꑳꈉꌠꊋꁈꄏ。ꋒꐯꋒꃅꇓꈓꈧꌠꇬꍔꃚꑲꅉꇤꂷꅐꑘꃷꎏꋊꐽꑴꌅꌅꈌꄻꇬꁳꄉ,ꇓꈓꉜꄉꏱꁈꌬ,ꄚꃆꂮꐥꌠꇓꈓꁳꀀꑳꏢꑲꃻꄻꏱꁈꇤꇧꎭꅀꋊꊨ、ꎃꐚꀀꑳꌋꆀꎃꐚꀀꑳꀋꉬꌠꎕꏦꇤꇧꎭꎻ。ꑳꇤꁨꇐꀖꁉꎆꏓꄟꌋꆀꃷꇐꑳꇤꂴꃷꄹꏦꄺꀱ。ꑲꅉꇤꂷꅐꑘꇗꏸꎴꄹꏦꄻꐛꒆ。

（45）ꃹꅼꃅꆅꉁꁬꋌꁦꎴꆄꄻꏦꉻꄺꀱ。ꋬꂻꃅꀻꎆꌠꄐꇐꃄꌬ,ꄉꉻꁦꎴꆄꄻꉻꑫꄻꐛꒆ，ꐧꋦꐯꇯꏲ、ꆅꉁꄴꏮꋯꐊ、ꆅꉁꄴꏮꐮꐊꌠꊥꎆ,ꍞꎖꌗꋏ、ꃨꆰꐨꄤꎖ、ꐥꈴꆅꌷꇐꍤꄻ、ꍤꎖꍤꄻ、ꃛꊸꃅꀞꄻ、ꆅꉁꈭꋏꉃꄻꑠꄐꊋꄻꀉꇨꃅꄉ。ꆅꉁ、ꆅꉁꄜꏂꀧ、ꆅꉁꁬꋌꋮꄮꃅꀻꎆꌠꌋꆀꏱꄻꌠꊥꎆ。ꊈꂄꆅꉁꅐꀦꍔꐯꌊꀏꒉꌠꌋꆀꃄꁕꐽꏡꄐꄻꌠꊥꎆ,ꐳꃅꊐꁸꆄꇠꆅꉁꉻꑫꋈꄻ,ꑖꑟꃅꐙꉹꌠꆅꉁꉻꄜꋈꄻꌠꄹꎆ,ꅉꂫꊐꌠꆅꉁꁦꎴꆄꄻꁧꃤꃅꌠꄻꀉꇨ。ꃹꅼꃅꉻꈲꃅꐙꌠꌌꍝꄎꅍꃅꄉꌠꉻꀞꆅꉚꅉꄺꀱ,ꆅꉁꁧꃤꃅꌠꌌꀨꇬꄉꌠꎆꎴꉺꏦꄻꐛ,ꃄꎆꄹꏦꄻꐛꒆ,ꁰꄻꇘꄟꋊꄻꉺꏦꄻꐛ。ꉹꁌꀰꏢꆅꉚꅉꋊꍬꄉꀻꎆꌠꄐꏁ。ꆅꉁꁦꎴꆄꄻꍞꏲꇇꁈꏀꀺ。ꏀꀺꁬꋌꌋꆀꆅꉁꉁꈾꀻꎆꊋꁈꄏꌠꉺꏦꄻꐛꒆ,ꍏꑱꁬꋌꊪꊛꏀꀺꀻꎆꉺꏦꄻꐛꒆ。

（46）ꊻꂷꀻꎆꊋꁈꄏꌠꌋꆀꁧꃤꃅꉻꑫꄻꐛꒆ。ꃀꌠꐛꈴ、ꀉꑳꌺꀁꑌꇁꌠꏭꊜꄻꌠꌌꀨꄉꌠꊻꂷꀻꎆꄐꇐꄻꐛꒆ,ꊾꂷꈁꐥꌠꃅꉱꑷ、ꋍꍂꊻꂷꁧꃤꃅꉻꑫꄻꐛꒆ,ꊻꂷꊇꁧꀊꂥꃅꀻꎆꌠꊥꎆ。ꒆꉘꊋꁈꄏꏱꁈꉻꑫꌋꆀꊋꊡꉺꏦꄻꐛꒆ,ꒆꉘꐮꄮꉹꌠꐧꋦꋈꄻꌠꄹꇙ。ꇿꋌꐥꃅꒆꉘ、ꉘꉚ、ꂘꑘꀨꊰꊨꒊ,ꒆꉘꑬꆏꄹꏦꄻꐛꒆ,ꒆꉘꁥꁵꄹꏦꄻꐛ,ꅉꀨꒆꉘꌋꆀꀊꉘꆅꉁꄉꉻꁧꃤꃅꑟꐨꉀꐕ,ꊨꏦꈁꊌꇗꏸꄂꈎꐨꊋꀉꒉꃅꇱ。ꊋꀥꇱꄉꁊꈲꌠꀊꉘꀨꎹꁧꃤꃅꉻꑫꋈꄻ，ꊾꌬꌤꃅꅉꀉꑳꀨꎹꅉꀞꄻꌠ、ꋥꁕꐮꃹꈴꃅꁠꉘꌠ、ꑱꈐꁠꉘꅉꑠꀞꄻꌠꈁꏦꀉꑌꑵꃅꀻꎆꌠꊋꁈꄏ。ꊻꂷꇙꐺꌠꉇꉻꈳꏦꒃꌫꄉ,ꄚꃆꂮꐥꌠꄉꉻꁧꃤꃅꌠꊿꐊꐺꌠꄹꇙ,ꇓꈓꇓꉈ、ꃄꁕꊻꂷꋭꋽꃅꏓꋧ、ꐥꀹꐥꃅꇙꐺꌠꊥꎆ。

ꏣꀋꑌꃅꊻꂷꃀꌠꐛꈴꌠꏭꊜꄻ,ꃀꌠꀨꎹꌤꑘꌋꆀꃀꌠꀨꎹꅐꑘꀻꎆꏱꁈꉺꏦꄻꐛꒆ。ꃀꌠꎆꏣꀻꎆ,ꃀꌠꇬꄉꄐꌠꀉꑌꑵꃅꐙ、ꑴꊈꐥꌠꃅꑘꊌꃅꈉꀹꄻ。ꊨꏦꉌꃹ、ꍕꎇꃅꐙꌠꏥꏦꇬꈴꄉ,ꋭꋽꃅꊱꁨꃅꋍꁘꋍꁘꃅꏦꏤꈎꄜꄯꄉꎞꆏꌠꄺꀱꌠꄹꎆ。ꅉꀨꃀꌠꀨꎹꁧꃤꃅꇲꁵꌠꄻꉾꃪ,ꋥꁕꃀꌠꀨꎹꁧꃤꃅꏲꉻꉗꄻ，ꉻꀞꃀꌠꀨꎹꏲꉻꀰꏢꉺꏦꄻꐛꒆ,ꎆꏂꑘꑠꐧꋦꊋꃤꊋꊡꌋꆀꄐꏁꄉꏣꀋꑌꃅꇫꐊꈽꇁ,ꐮꇇꀨꃅꐙꌠꃀꌠꀨꎹꁧꃤꃅꌠꄹꎆ,ꉃꉘꐮꏓꇱꌠꊥꎆ。ꐳꃅꂿ꒧ꁡꇤꃀꌠꀨꎹꁧꃤꃅꌠꀋꇎꀋꂪꅉꀥꇱ。ꃆꍸꌺꇜ、ꄣꅐꆐꅑꄐꅍꀋꐥꑠꐋꀋꌡꃅꌢꎭꌠꃀꌠꏭꁧꃤꃅꌠꄻꃪ,ꐳꃅꀊꉗꃅꀨꎹꌠꄜꏂꀧꄹꏦꄻꐛ。

ꊰꑋ、ꃹꅼꃅꒆꉻꌧꑳꏦꉻꄺꀱ

ꍏꇩꃤꐛꏀꈴꌠꆹꊿꌋꆀꋌꐛꐮꄮꃅꐯꈽꐥꌠꐛꏀꈴꌠꉬ。ꀋꎪꃅꒆꉻꌧꑳꄹꏦꉻꑫꄻꐛꒆ,ꐮꐊꄉꌋꊨ、ꍍꊨ、ꀊꃴꌠꍔꒉ、ꉀꎆꌠꄹꎆ,ꏣꀋꑌꃅꃄꀑꃅꌗꐛꐈꌠꏭꊜꄻ，ꐳꃅꒉꆧꁧꃴꌠꆹꐎꁧꏂꁧꉬꌠꉪꉻꃅꇫꑟꌠꏦꉻꉺꏦꄻꐛꒆ。

（47）ꒆꉻꌧꑳꅉꃀꏦꉻꄻꐛꒆ。ꃄꁕꁸ、ꍣꐨꈴ、ꊒꌸꃅꏱꋏꌠꒆꉻꋦꈭꏲꂠꄹꏦꃄꌬ,ꒆꉻꋦꈭꍞꎖꌋꆀꈋꍣꄹꏦꄻꐛꒆ。ꈁꉬꃄꁕꈁꉬꉹꑫꃅꉱꑷ、ꋍꃱꃅꐯꊛꌠꇩꏤꃄꅉꈥꈉꌬꍩꏱꏢꌋꆀꄐꎖꈌꁧꄹꏦꄻꐛꒆ。ꋌꐛꅐꀦꁨꇐꅐꇐꌅꈌꄹꏦꌋꆀꏲꂠꄹꏦꉻꑫꄻꐛꒆ，ꋍꏅꁨꌠꋌꐛꅐꀦꁨꇐꈁꁨꌅꈌꁠꄀꎃꃅꉺꏦꄻꐛꒆ,ꒆꉻꋦꈭꀧꌋꃅ、ꋌꐛꅐꀦꀧꌋꃅꌬꈧꌠꌋꆀꁨꇐꁌꀧꁌꎆꑠꆽꎍꐨꍤꎖꍞꊟꄹꏦꄻꐛ。ꇩꏤꒆꉻꋬꂻꌤꃅꋮꄮꉺꏦꄻꐛꒆ。ꒆꉻꋦꈭꏦꃤꀋꃀꁰꄻ。

（48）ꒆꉻꋦꈭꏱꄻꉻꑫꄻꐛꒆ。ꒆꉻꋦꈭꏱꄻꆽꎍꉻꑫ、ꍞꏲꉻꑫ、ꃷꎏꉻꑫ、ꏦꃤꏦꇗꏱꁈꉻꑫꋈꄻꌠꄹꎆ。ꊒꌸꃅꍍꆀꌠꏱꄻ、ꈆꑪꃅꍍꆀꌠꏱꄻ、ꏦꃤꇬꈴꄉꍍꆀꏱꄻꄹꏦꉺꏦꄻꐛꒆ,ꍍꒉꋊꎵꈌꁧꄹꏦꌌꈯꄜꃅꄉꌠꀋꇙꍍꆀꇁꀦꍞꏲꄹꏦꃄꌬꇫꑟ,ꍍꆀꐥꇐꀊꏀꌠꋮꄮꃅꏱꄻꌠꌋꆀꋦꈭꃨꆰꐨꏱꋏꉻꑫꄻꐛ,ꍍꆀꐥꇐꀉꑌꌠꋮꄮꃅꍍꋊꌠꄹꎆ。ꃹꅼꃅꋦꈭꈴꌗꏦꃤꇬꈴꄉꀖꅐꄹꏦꄺꀱ,ꋦꈭꉌꒊꍞꏲꉻꑫꏓꄻ。ꈳꁕꀋꂿꑘꌠꐰꉎꋍꉻꃅꐙꌠꒆꉻꋦꈭꏱꄻꉻꑫꏓꄻꌠꄹꇙ。ꐊꑷꃅꇩꏤꋍꏅꈩꅉꌌꀨꄜꃅꄉꌠꋧꐛꀧꌋꃅꅉꉻꑫꋈꄻꌠꄹꎆ。

ꒆꉻꀧꌋꃅꑟꅪꏲꂠꄹꏦꃄꌬꇫꑟ,ꁦꇉꒈꒉꌩꏪꋠꃅꎾꃝꅔꏂꂤꏂꋍꃱꃅꌠꀧꌋꃅꌋꆀꉻꑫꏱꄻꉺꏦꄻꐛꒆ,ꀉꑌꑵꃅꐙꌠꒆꉻꀧꌋꃅꄻꐛꅉꐛꌠꎆꇱꉺꏦꋈꄻ。ꒉꅐꀦꇨꃅꏢꑲꌠꄹꏦꃅꑞꅉꑟ，ꐊꑷꃅꒉꅐꀦꁌꏮꇗꏸꄺꀱꌠꄹꌬ。ꒆꇐꀉꑌꑵꃅꐙꌠꀧꌋꃅꌤꃅꋮꄮꉺꏦꄻꀉꇨ。ꎿꃀꅐꀦꀖꁉꀧꌋꃅꄹꏦꄻꐛꒆ。ꒆꉻꅐꇐꁌꐨꃅꇫꑟꉺꏦꄻꐛꒆ。ꃹꅼꃅꋌꐛꅐꀦꁌꁵꄉꌬꌠꄹꏦꄺꀱ。ꒆꉻꏓꇱꁵꊒꌠꄹꎆ,ꇂꃴꁁꏯꒆꉻꀧꌋꃅꁵꊒꉺꏦꄻꐛꒆ,ꏓꇲꄉꒆꉻꋦꈭꉮꈔꀵꊒꌠꄹꎆ。

（49）ꀊꃴꌋꀁꂥꌠꀻꎆꉺꏦꄻꐛꒆ。ꀊꃴꌋꀁꂥꌠꀻꎆꌠꊋꁈꄏꌠꏱꎆꇗꏸ、ꎆꒉꎆꇁ、ꎆꇱ、ꁌꏤꏱꁈꌋꆀꎕꏦꉻꑫꌫꄻ，ꀊꃴꌋꀁꂥꌠꅐꑘꀻꎆ,ꀊꃴꌬꈧꊋꊡꉺꏦꄻꐛꒆ,ꀊꃴꌋꀁꂥꌠꈭꏮꃅꀻꎆꌠꎆꏣꉻꑫꋈꄻꌠꊥꎆ。ꍔꃚꀊꃴꃅꃻꄻꌠꏱꁈꄻꃪ,ꀊꃴꇗꏸꄹꏦꄻꐛꒆ。ꅐꀦꈁꉬꃷꁨꏱꄻꌠꌋꆀꐊꑷꃅꏎꏸꌠꄹꏦꄻꐛꒆ,ꀉꀜꀊꇁꀱꏮꈲꌬꉻꑫꄻꐛꒆ。ꊖꌋꌃꎴꇿꋌꀊꂥꃅꈲꌬꌠꉺꏦꄻꐛꒆ。ꐳꃅꀊꏀꉹꌠꊋꀦꉻꑫꄐꎖꋈꄻ,ꊋꀦꀊꏀꋊꃬꌠꌋꆀꋊꁆꌠꏱꁈꏁꁈꄻꐛꒆ。ꃄꀑꃅꌗꐛꐈꌠꇬꄉꄐꌠꌤꃅꉻꑫꄻꐛꒆ。ꊋꃹꑍꑵꃅꋎꍅꌠꇬꄉꌋꋊꃑꑍꑵꃅꋎꍅꌠꇬꉜꄉꐊꑷꃅꉹꏮꌠꉺꏦꀊꏀꌠꄻꐛ。ꌋꋊꃑꏓꌗꌗꏢꉻꑫ、ꅐꇐꌋꌐꂷꏚꍆꄹꏦ、ꅐꇐꌋꐪꊂꏱꄻꉻꑫꏓꄻ，ꌋꃷꎏꃼꇇꄹꏦ、ꊸꑳꌗꊈꊨꏦꉌꃹꃅꊨꃑꃼꇇꄹꏦꄻꐛꒆ,ꏣꀋꑌꃅꋭꋽꃅꌋꋊꑞꅉꑟꌋꐛꐽꌠꄹꎆ。

ꊯꌕ、ꇩꏤꋬꂻꉻꑫꌋꆀꄐꊋꐛꏀꈴꌠꄹꎆ

ꇩꏤꋬꂻꌠꆹꍏꇩꃤꐛꏀꈴꌠꄔꐽꎴꏷꌠꅉ꒜ꀋꂿꑘꌠꉬ。ꀋꎪꃅꐊꑷꃅꉻꄜꇩꏤꋬꂻꉜꐨꃄꌬ,ꇩꏤꋬꂻꀧꌋꃅꌠꏦꉻꉺꏦꄻꐛꒆ，ꊇꁧꀊꂥꃅꀻꎆꌠꌋꆀꑞꅉꀊꂥꌠꋬꂻꉾꃪꃅꐮꇙꌠꃅꇫꑟ,ꃶꐚꃅꇩꏤꎴꏲꑘꒃꌠꏦꀧ。

（50）ꇩꏤꋬꂻꉻꑫꄻꐛꒆ。ꇩꏤꋬꂻꌤꃅꋮꄮꉺꏦꄻꀉꇨ,ꇩꏤꋬꂻꏦꏲꉻꑫ、ꄐꇐꉻꑫ、ꏱꁈꉻꑫ、ꃨꆰꐨꍞꎖꌗꋏꉻꑫꄻꐛꒆ,ꀋꉬꀋꉆꁁꏯꋬꂻꏦꀧꉻꑫꌋꆀꀋꂿꑘꌠꌐꐘꋮꄮꄐꇺꉻꑫꄻꐛꒆ。ꏓꇙꇿꋌꀊꂥꌠꇩꏤꋬꂻꀧꌋꃅꉻꑫꏓꄻ,ꇩꏤꋬꂻꈆꑪꇮꇐꊋꁵꌠꄹꎆ。

（51）ꄉꉻꋬꂻꏱꄻꉺꏦꄻꐛꒆ。ꀉꒉꀊꂾꃅꋋꇅꃅꅐꌠꄉꉻꌤꆿꀞꄻꏦꀧꉻꑫꄻꐛꒆ,ꋬꂻꀉꒉꀊꂾꌠꃛꊸꊜꄻꀉꒉꀊꂾꌠꇶꏦꇂꃴꇬꃛꊸꊜꄻꄐꇺꉺꏦꄻꐛꒆ,ꅉꂫꊐꌠꃛꊸꊜꄻꅉꃀꌋꆀꊋꃤꄻꀉꇨ，ꉮꄵꉮꊨꉮꌸꌠꈭꋏꄐꊋꉀꐕ。ꋬꂻꒃꅐꃨꆰꐨꋴꑌꁮꃅꍤꄻꏱꄻꌠꌋꆀꆽꎍꐨꀱꆽꃅꍤꄻꌠꉺꏦꄻꐛꒆ。ꋠꇐꁬꋌꉮꀋꐥꆽꎍꉻꑫꄻꐛꒆ。ꒆꇐꋬꂻꍞꏲꂴꌗꋏꄴꏮꋎꍅꉻꑫꄻꐛꒆ。ꊋꀥꇱꄉꈄꏍꋬꂻꏦꉻꋈꄻ,ꊿꄻꀑꁮꋬꂻꍞꏲꄹꏦꄻꐛ。

（52）ꐧꋦꏱꄻꉻꑫꄻꐛꒆ。ꃅꋊꀊꏀꋎꌠ“ꃖꐇꎖꋪ”ꌭꈬꌋꆀꀻꎆ,ꄈꎀꍹꏲꂠꌠꊨꏦꏲ、ꏦꏲ、ꑌꇐꏲꌠꐮꐊꐙꌠꇓꈓꇓꉈꅉꂫꊐꌠꏱꄻꉻꑫꄻꐛꒆ,ꐯꇯꋈꄻꐯꇯꏲꂠꐯꇯꈲꊌꌠꐧꋦꏱꄻꄹꏦꄻꐛꒆ。ꇩꏤꑭꊂꋍꃱꃅꌠꊻꂷꏲꂠꄹꏦꎹꎥꄻꐛ。ꐧꋦꌤꃅꏦꉻꉺꏦꄻꐛꒆ,ꊋꀥꇱꄉꄈꋈꄻꌠꌌꅉꂫꊐꌠꏱꄻꌠꏃꈻ,ꊋꀥꇱꄉꐧꋦꌤꃅꊿꁥꌠꁱꂘ,ꉌꇗꁧꃤꃅꉻꑫꋈꄻꌠꄹꇙ。ꄯꒉꅇꅲꌤꃅꏦꏲꈴꌠꄹꎆ。ꇓꈓꃄꁕꐧꋦꏱꄻꄐꊋꉀꐕ,ꇓꈓꀀꊿꊸꑟꑠꄉꉻꁧꃤꃅꐽꈉꂿꄐꄻꀉꇨ,“ꑘꅐꐨꀉꇨꃅꌤꐘꀞꐛ”ꌠꀋꉬꀋꉆꌤꆿꃷꁨꄯꒉꏲꂠꉺꏦꌋꆀꅉꀕꐛꄟꈴꃅꄹꎆꉺꏦꄻꐛꒆ。ꐧꋦꉌꇗꁧꃤꃅꉻꑫꌋꆀꃨꆰꐨꈌꄀꇇꏿꉺꏦꄻꐛꒆ。ꑱꈐꉙꄟꂘꄟꃅꇏꅉꃀꊐꌠꏱꄻꌠꇬꂿꄐꋊꇤꌠꉺꏦꄻꐛꒆ。ꃹꅼꃅꉹꑘꑠꉼꃼꇇꉼꄺꀱ。ꐧꋦꎀꍹꏲꂠꄹꏦꄻꐛꒆ。

ꑣꍔ（ꏦꎫ）ꃅꎁꌋꆀꌅꈌ、ꅐꀦꐮꄉꄐꌠꄹꏦꄻꐛꒆ,ꑣꍔ（ꏦꎫ）ꁧꃤꃅꏲꂠꊋꃤꊋꀥꇱ。ꐧꋦꋬꂻꏱꄻꉻꄜꄴꏮꋎꍅꉻꑫꄻꐛꒆ,ꀉꆈꌠꌩꀋꂄꌠꋊꌠꅉꀕꐛꄟꈴꌠꉺꏦꄻꐛꒆ,ꏦꃤꇬꈴꄉꏦꇨꃅꉹꁌꀉꇨꃅꇫꊂꉉꄜꌠꏦꐆꑽꃤꐆꌠꅓꀞ。

（53）ꉇꉻꃆꂮꐥꌠꇩꏤꋬꂻꉺꏦꄻꐛꒆ。ꈭꇍꋬꂻꌤꃅꋮꄮꉺꏦꄻꐛꒆ。ꎿꉈꈲꁧꌋꆀꎆꇱꐔꈔꉆꐨꂴꌗꋏ、ꄴꏮꋎꍅ、ꀧꌋꃅꏦꉻꉺꏦꄻꀉꇨ,ꃹꅼꃅꋬꂻꁁꏯꇩꏹꏦꌬꇷꃅ,ꉪꇩꏤꉻꊿ、ꏦꊿꎿꉈꏦꊒꌅꈌꈲꁧꀧꌋꃅ。ꏢꑲꌠꏭꁏ、ꉄꌎꌠꏭꁏ、“ꇇꎴꏱꄻ”ꌠꏭꁏꌠꉺꏦꄻꐛꒆ。ꎿꃀꌅꈌꈲꁧꀧꌋꃅꉺꏦꄻꐛꒆ。ꅉꆺꑭꊂꋬꂻꏱꄻꈽꌠꉺꏦꄻꐛꒆ。

ꊯꇖ、ꐪꊛꄉꃹꅼꃅꇩꐏꌋꆀꂽꄺꀱ

ꇩꐏꌋꆀꂽꐛꏀꈴꌠꆹꍏꇩꃤꐛꏀꈴꌠꇬꀋꉬꀋꉆꌠꄹꁆꉬ。ꀋꎪꃅꄈꆹꏓꂱꂽꏭꀋꎪꃅꏲꂠꌠꌭꈬ,ꃹꅼꃅꄺꀱꄉꂽꇨꌠꄐꇐꏤꁈꃄꌬ,ꏤꈉꈐꃅꂽꋈꄻꋍꉐꈎꉈꈽꌠꑞꅉꁻꌐꃅꇫꑟ、ꀑꐱꃅꇩꐏꌋꆀꂽꐛꏀꈴꌠꃅꇫꑟꌠꎁꃅꊋꑌꃅꏦꀧꌠꇲꁵ。

（54）ꏓꂱꂽꏃꂠꏲꂠꏦꉻꉺꏦꄻꐛꒆ。ꏮꊈꍗꑮꆽꎍꄹꏦꃄꌬꌠꄹꏦꉺꏦꄻꐛꒆ,ꃹꅼꃅꍔꍞꌌꂽꋈꄻꌠꄹꎆ。ꏮꊈꌤꏲꅉꌅꊋꁆꇱꌠꄻꃪ,ꌉꈿꋈꄻꊭꄎꏓꇲꃅꄹꎆꌠꉺꏦꄻꐛꒆ,ꀉꒉꀊꂾꃅꁈꏤꌠꅱꇖꄤꎖꉺꏦꄻꐛꒆ,ꃹꅼꃅꄐꇐꏤꁈꏲꂠꏀꀺ,ꂽꌤꏱꄻꉻꑫꄻꐛꒆ。ꏦꈴꂽꏲꌠꌤꃅꉺꏦꄻꐛꒆ。ꌉꈿꌉꊭꌉꄐ、ꂽꌤꊾꊋꅐꀦꑠꁁꏯꋬꈭꏱꁈꄹꏦꄻꐛꒆ。ꃹꅼꃅꂽꌶꅉꀊꂥꊐꌠꄺꀱ,ꌶꅉꀊꂥꊐꌠꈏꐊꊈꀻꎆꌠꄹꇙ。ꂽꇬꎆꏂꑘꌤꑘꌤꃅꅉꋊꄻꄺꀱꌠꃄꌬ。

（55）ꃹꅼꃅꐮꐊꌉꈿꉻꑫꄺꀱ。ꏮꊈꐮꐊꌉꈿꄐꇺꈯꄜꌅꊋꄻꐛꒆ,ꀉꒉꀊꂾꌠꋬꂻꁁꏯꄐꇺꄐꊋꄻꐛꒆ,ꍏꑷꉈꑴꇩꏤꌤꏲꅉꌋꆀꋮꄮꏮꈴꉺꏦꄻꐛ。ꍉꐎꐮꐊꌉꈿꄐꇺꈯꄜꄻꉻꄻꃪꃅꄉ,ꂿꃆꂽꐮꐊꌉꈿꄐꇺꊤꁸꈁꏦꄻꐛꒆ。ꊋꀥꇱꄉꈄꏍꈴꌗꉻꑫꋈꄻꌠꏂꋒꇫꋒ。ꀊꏀꉹꌠꂽꇜꂽꑼꉹꑫꐛꉻꄐꉻꏓꄻ,ꐳꃅꌉꁈꇷꇋꊋꃤꀻꎆ,ꊋꀉꒉꃅꅐꄉꈍꈐꀊꏀꐛꊈꀊꏀꌠꌉꈿꊋꃤꀻꎆ,ꏓꇲꃅꋊꃅꐥꌠꌉꈿꊋꃤꋈꄻꌠꊋꀥꇱ。ꃶꏢꂽꊋꃤꄻꉻꄻꃪ。

（56）ꃹꅼꃅꂽꃅꄷꐂꌠꄺꀱ。ꋍꃱꃅꐙꌠꇩꏤꄐꇐꏤꁈꉻꑫꌋꆀꄐꊋꋈꄻꌤꃅꉺꏦꄻꐛꒆ,ꂽꇬꃆꂮꐥꌠꁈꏤꌤꇖꋮꄮꏦꉻꉺꏦꄻꐛꒆ。ꇩꐏꋈꄻꌠꂽꌤꈉꐨꄛꇰꌋꆀꂽꌋꆀꃅꄷꐯꊛꉺꏦꄻꐛꒆ,ꇩꐏꄕꊪꉻꑫꄻꐛꒆ。ꃹꅼꃅꇩꐏꈆꑪꇮꇐꇮꑘꏦꉻꄺꀱ,ꇩꐏꈆꑪꇮꇐꇮꑘꄐꉻꄻꃪ,ꇇꌭꉁꈾꃻꄻꄹꏦꄻꃪ,ꂽꌬꇐꄐꄻꈲꊌꌠꉺꏦꄻꐛ,ꇇꌭꉁꈾꐛꏀꈴꌠꏲꂠꉻꑫꏓꄻ。ꂽꌋꆀꃅꄷꎕꏦꈴꌠꌤꃅꌠꏓꇲꉺꏦꄻꐛꒆ。ꃅꈯꈴ、ꂽꌬꇐꃼꇇꑠꁁꏯꋈꄻꌋꆀꏲꂠꌠꋍꃱꃅꄐꏤꌠꊋꀥꇱ。ꃅꋮꐏ꒺ꐏꏲꂠꏱꄻꏦꉻꉺꏦꄻꃪ,ꄈꍔꂽꏢꍤꉹꁌꊋꏓꃅꋮꏲꄻꌠꉺꏦꄻꐛꒆ。ꃹꅼꃅꂱꀘꄹꏦꄺꀱ。ꑍꉌꃹꌤꃅꉺꏦꄻꐛꒆ。

ꊯꉬ、ꄈꀒꁨꋍꁘꃅꐊꑷꃅꃹꅼꃅꄺꀱ、ꍏꇩꃤꐛꏀꈴꌠꄹꎆꌠꏭꏲꂠꌠꑟꐨꉀꐕ

ꄈꅿꏲꂠꌠꆹꀒꁨꋍꁘꃅꐊꑷꃅꃹꅼꃅꄺꀱ、ꍏꇩꃤꐛꏀꈴꌠꄹꎆꌠꁧꀦꄉꀧꅍꉬ。ꀋꎪꃅꃹꅼꃅ“ꑍꑵꏤꄻ”ꄉꌠꏤꇽꐨꈻꇐꌧꐚ,“ꇖꑵꉪꉻ”ꑌꈬ、“ꇖꑵꑴꑇ”ꌠꌭꈬ、“ꑍꑵꀧꌋꃅ”ꌠꃅꇫꑟ,ꄈꅿꑴꅉꇝꂱꌠꌌꐧꋦꇝꂱꄐꏁꌠꀊꂥꃅꑴꐚꌠꄝꀋꊰ，ꄺꀱꉌꊈꌋꆀꏦꇨꌠꎕꏦꌌꄈꏲꄈꄻꌠꌭꈬ,ꄈꅿꑴꅉꇝꂱꄹꏦꋊꍬꉻꑫꄻꐛꒆ,ꀋꆏꃅꄈꑴꅉꌃꎴ、ꑴꅉꄻꐛꒆ、ꑴꅉꏀꄻ、ꑴꅉꉀꐕꌠꄹꎆ,ꄈꆹꈍꄮꑌꍏꇩꐛꐨꐧꋦꉪꏦꌤꑘꇬꏲꂠꈯꄜꀉꇨꌠꐛꌠꄉꀧꌶ。

（57）ꄈꍏꑷꀒꁨꋍꁘꃅꐊꑷꃅꃹꅼꃅꄺꀱꌠꏭꏓꋧꋍꃱꃅꏲꂠꌠꌭꈬ。ꄈꍏꑷꆏꄺꀱꌠꉻꄜꄐꄻ、ꏓꇲꋮꄮ、ꈬꆸꄹꎆꌠꏃꂠ。ꄈꍏꑷꏤꁈꄐꁆꀉꒉꀊꂾꌠꃅꇫꑟꉺꏦꄻꐛꒆ,ꄈꍏꑷꉉꃅꏢꆏꌠꄉꀧ。ꈁꐥꊐꌠꄈꊈ（ꄈꊤ）ꆏꄈꍏꑷꁈꏤꄐꁆꌠꃅꇫꑟ，ꂱꑱꃅꄷꂱꑱꌤꏲꅉꄺꀱꌠꄐꎖꄉꄹꎆ,ꃶꐚꐛꐨꈴꄉꀹꄻꏀꀺꌠꊋꊡ,ꎖꋪꀊꏀꌠꌡꄻꉆ、ꁊꌬꉆꌠꀹꄻ。ꃅꋊꀊꏀꋎꌠꄈꅿꉹꁌꈛꏦꍬꋒ,ꐧꋦꉘꇉꐨ、ꉹꁌꀑꁮꐨ、ꌧꃀꉜꐨ、ꅉꂫꊐꌠꎖꋪꋒꐯꋒꃅꊘꌬꌊꄺꀱꄐꄻꅉꇬꇁ。ꐮꄙꐨꑓꅐꎑꌠꂥꀘꌠꇬꆼꒆꄉꄺꀱꇖꃆꄻꄉ,ꀋꉬꀋꉆꌠꄺꀱꄐꉻꒆꐛꌠꉺꏦꄻꃪ,ꇗꊈꌭꈬ、ꆹꑽꌠꄺꀱ,ꋋꇅꃅꌤꃆꌋꅜ、ꎎꍣꌠꄺꀱ。ꄺꀱꊋꊡꌠꌋꆀꈋꍣꄐꏁꌠꉺꏦꄻꐛꒆ,ꄺꀱꐥꀹꉾꃪꌠꋈꄻ。

（58）ꃹꅼꃅꄈꋈꄻꄹꏦꄺꀱ。ꄈꑭꊂꃅꄺꀱꌠꒃꉇ、ꀻꎆꌠꊥꎆꌠꏣꀋꑌꐨ、ꑴꇙꐨ、ꀹꄻꐨꄖꄑꌠꌌꊋꏿꅉꃅꄉ,ꄈꋈꄻꄹꏦꉺꏦꄻꐛꒆ。ꄈꅿꏀꀺꌧꇗꂘꄻꌠꊋꀥꇱ,ꌷꌠꌌꈯꊈꎵꄻ、ꌷꌠꌌꀊꅰꀑꁮ、ꌷꌠꌌꃅꇏꎃꇁ、ꌷꌠꌌꃅꐨꊥꎆꌠꎴꈲꉺꏦꄻꐛꒆ。ꃹꅼꃅꇥꀯꊿꌤꄹꏦꄺꀱ,ꊨꄅꃅꊾꌋꊾꌬꍝꄎꎃꊒꌠꐥ,ꊋꀉꒉꃅꍔꍞꀉꇨ、ꃅꀬꏿꀬ、ꋦꄉꄺꀱ、ꃶꐚꊌꐨꄞꅐ、ꃅꎃꐙꎴꌠꇥꀯꌊꄻ,ꊋꇤꄉꇥꀯꃄꈌꄐꃅꃅ、ꌤꀋꃅ、ꃅꀋꀬ、ꃅꀋꇮꌠꌤꃆꂥꀘ。ꏲꐛꉜꐨꎃꊒꌠꑌꈬꌋꆀꃄꄻ,ꇿꋌꐥꃅꏲꐛꉜꐨꎎꍣꌠꄴꏮꌋꆀꄺꀱꌠꌤꃅꉺꏦꄻꐛꒆ。“ꌕꑵꏡꃏꎼꇁ”ꌠꃅꇫꑟ,ꇥꀯꏀꀺꁨꆹ、ꌤꃅꑘꀺꌠꊋꊡ。ꏲꌋꇥꀯꄩꆹꀏꇁꉆꌠꅉꀕꐛꄟꈴꌠꄹꎆ,ꀋꃅꄉꅍꄻꀋꋭꌠꇥꀯꋊꄻꊋꃤꁦꎆꇱ。ꅉꀕꐛꄟꈴꃅꁰꍋꈜꀕꇈꅉꀨꁰꍋꉺꏦꄻꐛꒆ,ꌐꑘꁱꂘꌠꌋꆀꃄꄻꄜꎟꌠꄻꀉꇨꃅꄉ,ꐊꑷꃅꇥꀯꐛꏀꈴꋈꄻꄐꅍꉀꐕ。ꏲꌋꇥꀯꃅꎁꃄꄮꄹꏦꄻꐛꒆꌋꆀꃅꇫꑟ,ꏲꌋꁥꌠꌄꇤꊿꀋꉬꀋꉆꌠꆥꄻꏮꁵꌠꄹꏦꄻꐛꒆ。ꄈꎀꍹꍔꍞꂿꄐꌋꆀꎀꍹꂿꄐꄻꀉꇨ。ꊋꀥꇱꄉꎆꏣꎀꍹꀊꏀ、ꐧꋦꎀꍹꀊꏀ、ꃅꅍꊌꉻꁥꀊꏀꌠꄈꋈꄻꌠꈝ꒜ꇿꋌꐥꌠꎹꎥ。ꄈꑼꉙꂘꏲꂠ、ꂿꄐꋊꇤꉺꏦꄻꐛꒆ。ꄈꈏꇓꏦꇗꄻꐛꒆ,ꄈꈏꇓꏦꇗꋦꒉꐨꌋꆀꃄꌬꊋꃤꀉꇨꎻ。

（59）ꃹꅼꃅꄈꃅꇏꐙꎴꌠꋈꄻꌠꌋꆀꍹꈔꏭꁏꌠꄹꎆ。ꍔꍞꍞꊟꑭꋧꈴ、ꊒꌸꈴ、ꅉꀕꐛꄟꈴꌠꉺꏦꄻꐛꒆ。ꌦꀳꏿꄉꍏꑷꏤꐪꉆꐘꌠꉌꊈꃅꇫꑟ,ꇶꏦꉪꏦ、ꇛꌺꉪꏦꄴꏲꌠꄹꏦꉺꏦꄻꐛꒆ。ꐪꊛꄉꃀꈿꁱꐘꌋꆀꋍꑞꋍꉹꌡꀠꀹꄻ、ꋓꐨꈋꇽꎕꏦꑟ、ꋩꑍꋨꏦꄉꀨꃀꉉꎥꈉꃅꈧꌠꅧꊨꋊꍬ，ꏦꇨꃅꅉꂫꊐꌠꏭꉜꌠꍞꊟꍤꄻ、ꍤꄻ、ꍤꎖꌠꈁꉬꃷꁨꋎꍅ，ꍤꎥꊇꁧꐕꀊꂥ,ꊋꌗꀉꒉꃅꇤꄉꀉꑌꇨꌼꇪꇨꌠꌤꃆꂥꀘ。ꑣꍔ（ꏦꈜ）ꃅꎁꃅꌠꌤꆿꃷꁨꋏꄯꒉꏤꄻ,ꅉꂫꊐꌠꎁꃅꃣꁧꊨꌠꎴꈲꉺꏦꄻꐛꒆ。ꅉꀕꐛꄟꈴꌠꌋꆀꏓꋧꃅꐙꌠꐮꐊꐙꌠꍬꏦꉙꂘꉺꏦꄻꐛ,ꃹꅼꃅꍞꊟꍬꏦꃄꌬꌠ“ꇖꑵꐛꄟ”ꌫꄻ,ꏓꇱꄉꄈꅿꍬꏦꉙꂘꏢꑲ、ꏦꀧꊋꊡꂿꄐꋊꇤ。

ꋍꉻꃅꍹꈔꀋꀬ、ꍹꈔꀋꉆ、ꍹꈔꀋꏾꌠꌤꃅꉺꏦꄹꎆꌠꄻꐛꒆ,ꊋꇤꄉꍹꈔꌠꅐꇁꌠꅏꅉꌋꆀꇎꏦꋊꑣꇧꎭ。ꃅꇏꀋꎃꌠꌋꆀꍹꈔꌤꃆꐯꇯꍤꄻꐯꇯꏱꄻꌠꉺꏦꄻꐛꒆ,ꃹꅼꃅꌅꈌꏓꋧ、ꎆꀨꏓꋧ、ꅐꀦꀉꑌꃅꏓꋧꁁꏯꍹꈔꌠꏱꄻ,ꏦꇨꃅꏲꑘꃼꇇꐮꈻꐯꎷꄉꍔꍞꒆꉻꌋꆀꎆꏣꀻꎆꋦꈭꀜꐆꌠꌤꃆꍤꀞ,ꀋꉬꀋꉆꌠꃴꎆꍈꊿꏭꉻꏑꅓꈪꊐꌠꉺꏦꄻꐛꒆ,ꍹꈔꀊꏀꉹꌠꌋꆀꂁꐥꍹꈔꄴꏲꌠꇿꋌꐥꏡꁈꀉꑌꎻ。ꊋꀥꇱꄉꍍꋉꅇꎹꃅꐨꏱꄻ。ꆶꁧꌠꈹꆶꁧꌠꄴꏮꀋꎴꎆꋚꈪꌠꉺꏦꄻꐛꒆ。ꊋꀥꇱꄉꃅꋊꀊꏀꋎꌠꐙꎴꁱꀕꋈꄻ。

ꄈꌋꆀꇩꏤꍞꊟꉻꑫꄻꐛꒆ。ꐊꑷꃅꏦꇨꃅꄈꀨꄜꆽꎍꐨꌋꆀꍞꊟꆽꎍꐨꄻꀉꇨ。ꊋꀥꇱꄉ“ꀨꂶꌠ”ꌋꆀꏲꌋꁥꌠꏭꍞꊟꇱꄻꌠꄹꏦꄻꐛꒆ。ꌅꈌꁆꄻꌠꌋꆀꃄꌬꏢꑲꉺꏦꄻꐛꒆ,ꐋꀋꌡꌅꈌꉪꇐꌋꆀꐋꀋꌡꌅꈌꐛꐨꏭꁏ。ꍬꏦꃄꌬꏦꃤꃄꌬꌠꌋꆀꅓꑘꌦꃔꋭꋽꃅꐯꊛꌠꄹꎆ。ꏮꆫꏮꍤꌤꃅꏦꉻꉺꏦꄻꐛꒆ。ꍞꊟꍤꄻꌠꌋꆀꍤꄻꍤꆗꏲꉻꌅꊋꄻꃪ,ꊒꀕꃅꏲꂠꌤꃅꅉꍬꏦꍤꄻꍞꍤꌠꏦꉻꄻꐛꒆ,ꍏꑷꏲꌠꎆꏂꑘꏭꐊꑷꃅꍬꏦꍤꄻꍞꍤꊤꁆꍆꌠꄹꎆ。ꃹꅼꃅꅉꂫꊐꌠꍞꊟꏦꉻꉺꏦꄺꀱ。ꍹꈔꏭꁏꌠꇩꏤꏦꃤꏤꄻꌠꄹꎆ,ꍞꍤꏦꃤꄺꀱ,ꃅꋮꐂꄉꍹꈔꌠꏭꁏꌠꏦꃤꄻꅐꇁ。

（60）ꎸꇺꋯꌠꉌꊈꌌꄉꄺꀱꌠꃅꇫꑟꌠꒃꉇꋒ。ꄈꍏꑷꀒꁨꋍꁘꃅꐊꑷꃅꃹꅼꃅꄺꀱꌠꁈꏤꄐꁆꌠꏭꆏ,ꄈꑭꊂꃅꀋꎪꃅꇯꍝꌠꎹꃶꐚꌠꃅꌠꃅꇫꑟꌠꒃꉇ、ꃅꀬꃅꉔꃅꃅꇫꑟꌠꒃꉇꌶ,ꐰꉎꋮꄮꐊꃅ、ꅶꍯꀏꄩꏓꐊꌠꌭꈬ,ꈆꑪꃅꄺꀱꂿꃆꄯꒉ、ꄮꈉꑴꉻ、ꂴꄉꌠꊱꁨꐨꏤꄻ,ꋍꑞꋍꐘꄺꀱꃄꌬꀨꄜꌋꆀꆽꎍꐨꊨꄅ,ꀉꒉꀊꂾꃅꄺꀱꌠꃅꇫꑟꃆꂮꌌꍞꊟꍤꄻꌠꌋꆀꏮꆫꏮꍤꌠꐊꇐꇬꇱꄉ,ꃶꐚꊌꐨꃶꐚꇿꋌꌋꆀꏓꂱꉹꁌꉌꃹꐨꌊꄺꀱꌠꎕꑣ。

ꍏꇩꃤꐛꏀꈴꌠꆹꄮꐽꃅꀻꎆꌠꈝꃀꍬꌠꐛꏀꈴꌠꉬ。ꉇꉻꏭꌤꃅꇬꀋꎪꃅꄂꋦꑴꌅꌠꄮꐽꃅꉇꉻꑌꑲꌠꏱꁈꃄꌬꌶ,ꃰꊿꊫꂫꐮꐊꄜꏓꄻꌠꄹꇙ,ꋧꃅꃰꊿꏓꐊꁌꐨꃄꄻ,ꅉꆺꑭꊂꀻꎆꄕꊪ、ꅉꆺꑭꊂꋬꂻꄕꊪ、ꅉꆺꑭꊂꌧꑳꄕꊪꌠꃅꇫꑟ,ꐥꊯꊱꁨꌠꋧꃅꀉꑌꑵꃅꐙ、ꈲꈴꅓꏆꌠꎆꏣꅉꆺꈴꌠꄕꊪ,ꃹꅼꃅꉇꉻꑌꑲꌤꃅꉺꏦꄺꀱ,ꅉꆺꑭꊂꏱꄻꉻꑫꄺꀱꌠꌋꆀꋈꄻꌠꄐꏁꈽ,ꀋꎪꃅꇩꏤꌅꀨ、ꋬꂻ、ꀻꎆꈲꁧꀧꌋꃅ,ꀒꁨꋍꁘꃅꐊꑷꃅꃹꅼꃅꄺꀱ、ꍏꇩꃤꐛꏀꈴꌠꄹꎆꌠꎁꃅꉇꉻꋦꈭꉾꃪꌠꋈꄻ。

ꄈꑭꊂꂽꑭꊂꇩꏤꑭꊂꊿꋅꈁꐥꌠꏓꂱꆏꀊꅰꃅꑖꑟꃅꋯꑌꌊꐋꀨꑮꏣꀻꈯꄜꃅꄉꌠꄈꍏꑷꈭꇍꄉ,ꄺꀱꁉꃑꁈꁧꀊꂥꃅꐕꄉ,ꉌꋧꊋꏓ、ꊋꇤꄉꀒꁨꆹ,ꐊꑷꃅꐧꋦꉪꏦꐛꏀꈴꇩꏤꀉꇨꌠꄻꐛ、ꉐꈎꉈꈽꁻꌐꑍꂷꂶꌠꃅꇫꑟ,ꍏꇩꃤꐛꏀꈴꌠꌌꐊꑷꃅꍏꉸꊿꋅꇰꀋ꒜ꃅꀱꌄꆣꇁꌠꄹꎆꌠꎁꃅꊋꇤꄉꉈꈽ。